ភ្នំពេញ៖ ស្ត្រីម្នាក់ បានព្យួរកាបូបជាប់នឹងកម៉ូតូ ជិះទៅហាងជាងរៀបចំតុទូ ត្រូវបានជនសង្ស័យម្នាក់ឆក់យកទៅបាត់ ទើបមកប្តឹងសមត្ថកិច្ចឲ្យជួយស្រាវជ្រាវតាមចាប់ជនសង្ស័យខាងលើ កាលពីវេលាម៉ោង៣និង២៥នាទី រសៀលថ្ងៃទី១៣ ខែមីនា ឆ្នាំ២០២១ លើផ្លូវលេខ៩៩ ភូមិទួលសង្កែ សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ ។

របាយការណ៍សមត្ថកិច្ចបញ្ជាក់ថា ជនរងគ្រោះមានឈ្មោះ ឈឿន ហួរ ភេទស្រី អាយុ ៣៩ឆ្នាំ មុខរបរលក់ដូរ មានទីលំនៅផ្លូវលេខ៣៦ ភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ។

ស្ត្រី ឈឿន ហួរ បានបញ្ជាក់ថា គាត់បានជិះម៉ូតូចេញពីផ្ទះទៅហៅជាងឲ្យមកជួយរៀបតុទូរ ដោយយកកាបូបយួរដៃព្យួរជាប់កម៉ូតូ ហើយក៏ត្រូវជនសង្ស័យម្នាក់ ជិះម៉ូតូមួយគ្រឿងមកឆក់យកកាបូប ដែលមានទូរស័ព្ទ iphone11 proMax មួយគ្រឿង ,ទូរស័ព្ទ Samsung Galaxy Note9 ចំនួន១គ្រឿង, អត្តសញ្ញាណប័ណ្ណសញ្ជាតិខ្មែរមួយសន្លឹក , លុយថៃ ៥,០០០បាត, លុយដុល្លារ ២០០ដុល្លារ, លុយខ្មែរ៤០០,០០០រៀល, កាតធនាគារABAមួយសន្លឹក , កាតគ្រីរថយន្តលុចស៊ីស៣៣០ ចំនួន០១សន្លឹក និងកាតគ្រីម៉ូតូចំនួន ២គ្រឿងទៀត ៕