ខេត្តបាត់ដំបង៖ ជនសង្ស័យចំនួន២នាក់ ត្រូវបានសមត្ថកិច្ចខេត្តបាត់ដំបងធ្វើការចាប់ឃាត់ខ្លួន ក្រោយប្រើឲ្យក្មេង ចូលលួចគាស់តូបវេរលុយ កាលពីវេលាម៉ោង០២និង១២នាទីរំលងអាធ្រាត្រ ថ្ងៃទី១៣ ខែមីនា ឆ្នាំ២០២១ ចំណុចចក្រុមទី៤៨ ភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង។
របាយការណ៍សមត្ថកិច្ចបានបញ្ជាក់ថា ក្រោយរត់គេចខ្លួនបាន១ថ្ងៃ សមត្ថកិច្ចខេត្តបាត់ដំបង បានស្រាវជ្រាវចាប់ឃាត់ខ្លួនបានជនសង្ស័យទាំង២នាក់ ។
ទី១ឈ្មោះ ឡា ពោ ភេទប្រុស អាយុ១១ឆ្នាំ ស្នាក់នៅភូមិចំការសំរោង២ សង្កាត់ចំការសំរោង ក្រុងបាត់ដំបង ខេត្តបាត់ដំបង និងទី២ឈ្មោះ ម៉ៅ កុសល ភេទប្រស អាយុ២៨ឆ្នាំ ស្នាក់នៅមិនប្រាកដ ។
របាយការណ៍ដដែលបានបញ្ជាក់ថា ជនរងគ្រោះឈ្មោះ ប៉ិច បុណ្ណា ភេទប្រុស អាយុ៥០ឆ្នាំ រស់នៅភូមិឃុំកើតហេតុខាងលើ ត្រូវបានជនសង្ស័យគាស់ទូដាក់លុយ ប្រមូលយកប្រាក់ប្រមាណជា ០១លានរៀល និងក្រវិលកំប៉ុងស្រាបៀដែលត្រូវង្វាន់មួយចំនួន។
បច្ចុប្បន្នជនសង្ស័យខាងលើ ត្រូវបានសមត្ថកិច្ចធ្វើការសាកសួរ និងកសាងសំណុំរឿងចាត់ការតាមច្បាប់បន្តទៀត៕
