រាជធានីភ្នំពេញ ៖ ករណីគ្រោះថ្នាក់ចរាចរណ៍មួយបានកើតឡើង ដោយរថយន្តដឹកទឹកកក ធុនធំមួយគ្រឿង បើកបុករះរម៉កកង់បីឥណ្ឌា ២ គ្រឿង និងរថយន្តព្រុសមួយគ្រឿង បណ្ដាលឲ្យរងការខូចខាតយ៉ាងដំណំ តែសំណាងគ្មានអ្នកធ្ងន់ធ្ងរអ្វីនោះទេ បង្កការភ្ញាក់ផ្អើលកាលពីវេលាម៉ោង១០ យប់ ថ្ងៃទី២២ ខែមិថុនា ឆ្នាំ២០២១ នៅតាមបណ្ដោយផ្លូវ ២១៧ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។

តាមប្រភពព័ត៌មានបឋម ពីកន្លែងកើតហេតុ បានឲ្យដឹងថា មុនពេលកើតហេតុ គេឃើញរថយន្តធុនធំមួយគ្រឿង បើកបោះពួយយ៉ាងលឿន ក្នុងទិសដៅពីជើងទៅត្បូង មកដល់ចំណុចកើតហេតុ ក៏បានបើកបុករះម៉ូតូកង់បីឥណ្ឌា ២ គ្រឿងនិងរថយន្តម៉ាកព្រុសមួយគ្រឿង បណ្ដាលឲ្យរងការខូចខាតយ៉ាងដំណំ ផ្អើលដល់សមត្ថកិច្ចមូលដ្ឋាន បានទំនាក់ទំនងហៅសមត្ថកិច្ចជំនាញចរាចរណ៍ផ្លូវគោក ចុះមកធ្វើការវាស់វែង ដោយយកវត្ថុតាង ទៅរក្សាទុក នៅអធិការដ្ឋាននគរបាលខណ្ឌដង្កោ ដើម្បីដោះស្រាយគ្នាទៅតាមផ្លូវច្បាប់បន្តទៀត៕