រាជធានីភ្នំពេញ ៖ រន្ធត់មែន មនុស្សចំនួន៤នាក់ បានរងរបួសធ្ងន់ រណូករណែលពេញផ្លូវ ខណៈកំពុងជិះម៉ូតូ ត្រូវបានរថយន្តស៊េរីទំនើបម៉ាក Rolls Royce មិនចាំស្លាកលេខមួយគ្រឿង បុកពេញទំហឹង រួចបន្តល្បឿនបើករត់គេចខ្លួនបាត់ស្រមោល។

ហេតុការណ៍នេះកើតឡើងកាលពីវេលាម៉ោង១២យប់រំលងអាធ្រាត្រ ឈានចូលថ្ងៃទី២៣ មិថុនា ២០២១ នៅចំណុចស្តុបប៉េកាសេ ផ្លូវព្រះមុនីវង្ស កែងផ្លូវព្រះអង្គឌួង ព្រំប្រទល់ សង្កាត់ស្រះចក និងសង្កាត់វត្តភ្នំ ក្នុងខណ្ឌដូនពេញ រាជធានីភ្នំពេញ។

តាមប្រភពព័ត៌មានពីបងប្អូនប្រជាពលរដ្ឋ នៅកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តស៊េរីទំនើបម៉ាក Rolls Royce មួយគ្រឿង ពណ៌ស ធ្វើដំណើងពីជើងទៅត្បូង មិនចាំស្លាកលេខ បានបើកមកបុកម៉ូតូឌ្រីមសេ ១២៥ ដែលកំពុងជិះពីលិចទៅកើត ឌុបគ្នាចំនួន ៤ នាក់ ពេញមួយទំហឹង បណ្ដាលឲ្យរងរបួសធ្ងន់ទាំង៤នាក់ រួចបន្តល្បឿនបើករត់បាត់ បង្កការភ្ញាក់ផ្អើលនៅនឹងមុខប៉ុស្តិ៍នគរបាលស្រះចក ភ្លាមៗសមត្ថកិច្ចបានទំនាក់ទំនងហៅរថយន្តសាមុយ ដើម្បីមកយកជនរងគ្រោះទៅមន្ទីរពេទ្យ ។

ចំណែករថយន្តបង្ក ដែលបើករត់នោះ កម្លាំងសមត្ថកិច្ចអន្តរាគមន៍របស់អធិការនគរបាលខណ្ឌជ្រោយចង្វារ បានដេញតាមឃាត់ រហូតដល់រថយន្តនោះបើករត់ចូលក្នុងផ្ទះមួយកន្លែង នៅតាមដងផ្លូវកែវចិន្តា ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ទើបទាក់ទងបន្តទៅជំនាញចរាចរណ៍ផ្លូវគោករបស់អធិការនគរបាលខណ្ឌដូនពេញ ឲ្យចុះមកត្រួតពិនិត្យនិងមើលស្លាកស្នាម ដើម្បីហៅម្ចាស់រថយន្តចូលមកដោះស្រាយ តែមិនឃើញ និងឆែកមើលកាមេរ៉ាសុវត្ថិភាព រួចយក រថយន្តស៊េរីទំនើបនោះ ទៅរក្សាទុកនៅស្នងការដ្ឋាននគរបាលរាជធានីភ្នំពេញ ដើម្បីដោះស្រាយតាមនីតិវិធីច្បាប់។