ខេត្តបាត់ដំបង ៖ ជនសង្ស័យម្នាក់ ត្រូវបានសមត្ថកិច្ចធ្វើការចាប់ឃាត់ខ្លួន ខណៈដែលជនសង្ស័យរូបនេះ ជាមនុស្សប្រមឹក ខឹងប្រពន្ធមិនដាំបាយឱ្យហូប ក៏យកដំបងឫស្សី វាយប្រពន្ធរបួសធ្ងន់ធ្ងរ តែម្តង កាលពីវេលាម៉ោង ១០ និង៣០នាទីព្រឹក ថ្ងៃទី២៣ ខែមិថុនា ឆ្នាំ២០២១ នៅចំណុចក្រុមទី១៦ ភូមិទួល ព្រុំ ២ ឃុំក កោះ ស្រុកមោងឫស្សី ខេត្តបាត់ដំបង ។
ជនសង្ស័យរូបនេះមានឈ្មោះ ពៅ វិចិត្រ ហៅវាំង អាយុ៦៨ឆ្នាំ រស់នៅចំ ណុចកើតហេតុខាងលើ បានយកដំបងឫស្សីវាយប្រពន្ធរបស់ខ្លួនអាយុ៤៨ឆ្នាំ បណ្ដាលឱ្យរងរបួសដើមដៃខាងធ្វេង០១កន្លែង(បាក់) និងរបួសឆ្អឹងជំនឺផ្នែកខាងក្រោយ០១កន្លែងហើមជាំ (របួសធ្ងន់) ។
សមត្ថកិច្ចបានបញ្ជាក់ថា មុនពេលកើតហេតុ បុរសជាប្តីវ័យចំណាស់រូបនេះ បានប្រើដំបងឫស្សី វាយសំពងទៅទីលើប្រពន្ធរបស់ខ្លួនយ៉ាងដំណំ បង្កឲ្យមានការភ្ញាក់ផ្អើល ហើយបន្ទាប់ពីកើតភ្លាម សមត្ថកិច្ចនគរបាលបានចុះអន្តរា គមន៍ឃាត់ខ្លួនជនសង័្សយជាប្តីតែម្តង និងដកហូតបានដំបងឫស្សីមួយដើម រីឯប្រពន្ធដែលទទួលរងរបួសបាន នាំទៅសង្រ្កោះនៅមន្ទីរពេទ្យ។
សមត្ថកិច្ចបានបញ្ជាក់ទៀតថា ចំណែកមូលហេតុ គឺដោយ សារបុរសជាប្តីផឹកស្រាស្រវឹង និងខឹងប្រពន្ធមិនបានដាំបាយឲ្យប្តីហូបនៅព្រឹកនោះ។ បច្ចុប្បន្នជនសង្ស័យខាងលើត្រូវបាននគរបាលស្រុក ឃាត់ខ្លួននិងកសាងសំណុំរឿងបញ្ជូនអនុវត្តតាមច្បាប់៕ ប្រភព៖ ស្នងការដ្ឋាននគរបាលខេត្តបាត់ដំបង
