រាជធានីភ្នំពេញ៖ ប៉ះចំថ្ងៃស៊យរបស់លោកចោរ! ក្រុមជនសង្ស័យមានគ្នាប្រមាណ៣នាក់ ជិះម៉ូតូ២គ្រឿង បានមកធ្វើសកម្មភាពឆក់កាបូបរបស់នារីម្នាក់ មិនបានសម្រេច ត្រូវសមត្ថកិច្ចប្រចាំគោលដៅ នៅស្តុបណតប៊្រីតឃើញទាន់ ភ័យពេកផ្តួលម៉ូតូចោល កាបូបក៏ឆក់មិនបាន ប្រញាប់រត់ផាស់ក្រញ៉ាំ ឡើងជិះម៉ូតូបក្ខពួក រត់គេចខ្លួនបាត់ កាលពីវេលាម៉ោង ៦និង៣៥នាទីល្ងាចថ្ងៃ២៣ ខែមិថុនា ឆ្នាំ២០២១ ម្តុំស្តុបណតប្រ៊ីត ផ្លូវ២០០៤កែងផ្លូវទ្រុងមាន់ ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។

សមត្ថកិច្ចបានបញ្ជាក់ថា ដំបូងឡើយបានឃើញ នារីម្នាក់ ដែលជាជនបរទេស ជិះម៉ូតូម៉ាកស្កុបពី ពណ៌ស ពាក់ស្លាកលេខ ភ្នំពេញ 1FQ-7649 តាមផ្លូវលេខ២០០៤ ពីលិចទៅកើតស្រាប់តែមានជនសង្ស័យម្នាក់ ជិះម៉ូតូម៉ាកស៊ុយសាគីនិច ស៊េរីឆ្នាំ២០២១ ពណ៌ស ពាក់ស្លាកលេខ ភ្នំពេញ 1IS-1779 និងម៉ូតូមួយគ្រឿងទៀតមិនចាំម៉ាក មកធ្វើសកម្មភាពឆក់កាបូបរបស់នារីរងគ្រោះ តែមិនបានសម្រេច ត្រូវសមត្ថកិច្ចប្រចាំគោលដៅ នៅស្តុបណតប៊្រីតឃើញទាន់ ធ្វើឲ្យជនសង្ស័យភ័យពេកផ្តួលម៉ូតូចោល កាបូបក៏ឆក់មិនបាន ប្រញាប់រត់ផាស់ក្រញ៉ាំ ឡើងជិះម៉ូតូបក្ខពួក រត់គេចខ្លួនបាត់ បន្សល់ទុកម៉ូតូ១គ្រឿង នៅកន្លែងកើតហេតុតែម្តង ។

ក្រោយកើតហេតុ សមត្ថកិច្ចក៏បាននាំនារីរងគ្រោះ ទៅដាក់ពាក្យបណ្តឹង ដើម្បីស្រាវជ្រាវរកជនសង្ស័យយកមកផ្តន្ទាទោសតាមច្បាប់បន្តទៀត៕