ភ្នំពេញ៖ ទំនាស់ក្នុងរង្វង់គ្រួសារប្តីដើរចោលប្រពន្ធរហូត រហូតផ្ទុះហិង្សាប្អូនថ្លៃ ទ្រាំលែងបាន ទាញកាំបិតកាប់បងថ្លៃ រងរបួសធ្ងន់ ត្រូវបានសមត្ថកិច្ចធ្វើការចាប់ឃាត់ខ្លួន កាលពីវេលាម៉ោង២និង២៥នាទី រសៀលថ្ងៃទី១៦ ខែមីនា ឆ្នាំ២០២១ នៅចំណុចភូមិប៉ប្រកខាងជើង ក្នុងសង្កាត់កាកាបទី ១ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានបញ្ជាក់ថា ជនសង្ស័យមានឈ្មោះ ឆៃ ភេទប្រុស អាយុប្រហែលជាង ២០ ឆ្នាំ។ ចំណែកឯជនរងគ្រោះត្រូវជាបងថ្លៃមានឈ្មោះសុខ លាង ភេទប្រុស បានឈ្លោះប្រកែកគ្នាតឹងសរសៃក ដោយសារប្អូនថ្លៃខឹងបងថ្លៃរបស់ខ្លួន មិនខ្វល់នឹងបងស្រីដើរចោលបាត់ៗ។
សមត្ថកិច្ចបានបន្តថា ទើបប្អូនថ្លៃបានទាញកាំបិតកាប់ទៅលើបងថ្លៃបណ្ដាលឲ្យរបួសធ្ងន់ធ្ងរត្រូវក្បាល ហើយរត់គេចខ្លួនចូលទៅក្នុងវត្តពោធិ៍ចិនតុង តែត្រូវបានកម្លាំងសមត្ថកិច្ចដេញចាប់បានយកមកសាកសួរនៅប៉ុស្តិ៍កាកាបទី ១ ដើម្បីចាត់ការតាមនីតិវិធីច្បាប់។ ចំណែកបងថ្លៃដែលរបួសត្រូវបានបញ្ជូនទៅមន្ទីរពេទ្យបង្អែកពោធិ៍ចិនតុង៕
