ខេត្តបន្ទាយមានជ័យ ៖ ចាប់បានហើយ ឃាតកកាប់សម្លា.ប់ស្ត្រីចំណាស់មេម៉ាយរឿងទំនាស់ព្រំដី ដែលឃាត់ខ្លួនបាននៅវេលាម៉ោង៥ និង៣០នាទី ថ្ងៃទី២៧ ខែមិថុនា ឆ្នាំ២០២១ ក្នុងភូមិឃូស្វាយ ឃុំបុស្បៅ ស្រុកព្រះនេត្រព្រះ ខេត្តបន្ទាយមានជ័យ។

លោកវរៈសេនីយ៍ឯក មាស រិទ្ធី អធិការដ្ឋាននគរបាលស្រុកព្រះនេត្រព្រះបានប្រាប់ថា៖ ជនសង្ស័យឃាតកដែលត្រូវឃាត់ខ្លួនមានឈ្មោះ ចយ សឺន ភេទប្រុសអាយុ៦៩ឆ្នាំ រស់នៅភូមិខាងលើ។

លោកបានបញ្ជាក់ថា៖ កាលពីវេលាម៉ោង១២រសៀលថ្ងៃទី២៦ ខែមិថុនា ឆ្នាំ២០២១ស្ថិតភូមិឃូស្វាយ ឃុំបុស្បៅ ស្រុកព្រៈនេត្រព្រៈ មានករណីឃាត់កម្មកាប់សម្លាប់លើជនរងគ្រោះឈ្មោះ សូ សួង ភេទស្រី អាយុ៧៤ឆ្នាំ (ជាស្ត្រីមេម៉ាយ) រស់នៅភូមិខាងលើ ដោយឃាតកកាប់ចំក្បាលពីក្រោយចំនួន៤កន្លែងស្លាប់ក្នុងផ្លុកឈាមក្នុងបន្ទប់ផ្ទះជាន់ក្រោមឈើលើថ្មក្រោម ខណៈពេលដែលកំពុងដេកលង់លក់ជាមួយចៅប្រុសបានឃើញដែលឃាតកបានរត់គេចខ្លួន។

លោកវរៈសេនីយ៍ឯក មាស រិទ្ធី បានបញ្ជាក់ថា៖ក្រោយមានករណីឃាតកម្មកាប់សម្លាប់ជាការណែនាំពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានអោយកម្លាំងជំនាញខេត្តសហការជាមួយកម្លាំងអធិការដ្ឋាននគរបាលស្រុកបានចុះពិនិត្យសាកសពជនរងគ្រោះហើយស្រាវជ្រាវកំណត់មុខសញ្ញាបានឃាត់ខ្លួនឃាតកដៃដល់ឈ្មោះ ចយ សឺន ភេទប្រុសអាយុ៦៩ឆ្នាំនិងវត្ថុតាងពូថៅចំនួន១ នៅវេលាម៉ោង៥និង៣០នាទីថ្ងៃទី២៧ ខែមិថុនា ឆ្នាំ២០២១ ស្ថិតភូមិឃូស្វាយ ឃុំបុស្បៅ ស្រុកព្រះនេត្រព្រះ។

លោកបានបញ្ជាក់ថា៖ក្រោយឃាត់ខ្លួនជនសង្ស័យឃាតកដៃដល់ហើយត្រូវបានបញ្ជូនមកស្នងការដ្ឋាននគរបាលខេត្តបន្ទាយមានជ័យ ដើម្បីធ្វើការសាកសួរតាមចម្លើយសារភាពមូលហេតុដែលកាប់សំលាប់ស្ត្រីរងគ្រោះ ព្រោះរឿងទំនាស់ព្រំដី ភូមិរបងជាប់គ្នាទើបមានឱកាសបានចូលកាប់ស្ត្រីរងគ្រោះបណ្តាលឲ្យស្លាប់ ក្រោយសាកសួរហើយត្រូវរៀបសំណុំរឿងបញ្ចូនទៅសាលាដំបូងខេត្តបន្ទាយមានជ័យដើម្បីចាត់ការតាមច្បាប់៕ ដោយ៖ចិន្ត្រា