កំពង់ឆ្នាំង៖ ឈ្លោះប្រកែកជាមួយប្រពន្ធ ប្តីផ្ទុះកំហឹងរហូតក្លាយទៅជាជនសង្ស័យត្រូវសមត្ថកិច្ចចាប់ឃាត់ខ្លួន ដើម្បីចាត់ការតាមច្បាប់ ក្រោយយកពូថៅកាប់ទៅលើប្រពន្ធ ចំខ្នងដៃរបួសធ្ងន់ កាលពីវេលាម៉ោង១១និង៣០នាទី ថ្ងៃទី១៦ ខែមីនា ឆ្នាំ២០២១ ភូមិត្រពាំងម្ទេស ឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំង។
របាយការណ៍សមត្ថកិច្ចបញ្ជាក់ថា ជនសង្ស័យឈ្មោះ ស សៅ ភេទប្រុស អាយុ៥៩ឆ្នាំ ជនជាតិខ្មែរ មុខរបរកសិករ មានទីលំនៅបច្ចុប្បន្នភូមិត្រពាំងម្ទេស ឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំង បានឈ្លោះប្រកែកជាមួយប្រពន្ធ ហើយក៏បានរត់ទៅយក ពូថៅ ផ្លែដែក ដងឈើ កាប់ដៃប្រពន្ធ អាយុ៥២ឆ្នាំ ហូរឈាមរហូតងងឹតមុខដួលសន្លប់ភ្លាមៗ ត្រូវអ្នកភូមិដឹកយកទៅកាន់មន្ទីរពេទ្យ នៅរាជធានីភ្នំពេញ ។
ចំណែកជនសង្ស័យជាប្តីត្រូវបានសមត្ថកិច្ចធ្វើការឃាត់ខ្លួន កសាងសំណុំរឿងបញ្ជូនទៅស្នងការនគរបាលខេត្តកំពង់ឆ្នាំង ដើម្បីចាត់ការបន្តទៅតាមនីតិវិធីច្បាប់ ៕
