រាជធានីភ្នំពេញ ៖ បុរសម្នាក់បើករថយន្ដ Lexus 330 មួយគ្រឿង សង្ស័យលឿនពេក បុកសួនច្បារផ្លូវសហព័ន្ធរុស្សី ហោះចូលក្នុងរបងផ្សារទំនើបបាយ័ន បន្តបុករបងលក់រថយន្ដទំនើបថែមទៀត បណ្តាលឲ្យរងការខូចខាតយ៉ាងដំណំ កាលពីវេលាម៉ោង ៤យប់ ឈានចូលថ្ងៃទី៣០ ខែមិថុនា ឆ្នាំ២០២១ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។

តាមប្រភពពីបងប្អូនប្រជាពលរដ្ឋ បានអោយដឹងថា មុនពេលកើតហេតុ គេបានឃើញរថយន្ដ Lexus RX330 មួយគ្រឿង ពណ៌ទឹកមាស ពាក់ស្លាកលេខ ភ្នំពេញ 2BK-1359 បើកបរដោយបុរសម្នាក់ សង្ស័យក្នុងល្បឿនលឿន បានទៅបុកនឹងខឿនសួរច្បារ ហើយរថយន្ដក៏បែកកង់ បន្តល្បឿនបុកចូលរបងផ្សារទំនើបបាយ័ន និងបន្ដទៅបុករបងលក់រថយន្ដស៊េរីទំនើប ហាង ហេង ហ៊ុយ បណ្តាលឲ្យខូចខាតយ៉ាងដំណំ ភ្លាមនោះរថយន្ដជិតឆេះ ក៏ផ្អើលប្រជាពលរដ្ឋ នាំគ្នាយកបំពង់ពន្លត់អគ្គីភ័យមកបាញ់ មិនឲ្យមានការឆាបឆេះ យកមនុស្សដែលនៅក្នុងរថយន្ដចេញមក បាន៣នាក់ សំណាងណាស់គ្មាននរណាម្នាក់ រងរបួសនោះឡើយ។

ក្រោយកើតហេតុសមត្ថកិច្ចនគរបាលចរាចរណ៍មូលដ្ឋាន សហការជាមួយនគរបាលចរាចរណ៍ក្រុង បានចុះមកធ្វើការវាស់វែង យករថយន្តខាងលើ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយគ្នាតាមច្បាប់បន្តទៀត៕