រាជធានីភ្នំពេញ ៖ ក្រោយមានភ្លៀងមួយមេធំ លាយឡំជាមួយនឹងខ្យល់បោកបក់ផងនោះ បានបណ្តាលឲ្យដើមឈើធំៗជាច្រើនដើម និងមានដើមឈើខ្លះ បានរលំបាក់សង្កត់ទៅលើកង់បី និងកង់បីឥណ្ឌាសរុបចំនួន ៣គ្រឿង ក្នុងនោះមាន១គ្រឿង ដែលមានស្ត្រីម្នាក់ដែលទើបតែឆ្លងទន្លេរួចបានចេញមកដកលុយ បណ្តាលឲ្យរងរបួសផងដែរ ចំណែកកង់បីក៏រងការខូចខាត នៅតាមបណ្ដោយផ្លូវសហព័ន្ធរុស្ស៊ី កាលពីវេលាម៉ោងប្រមាណជិត៤ល្ងាច ថ្ងៃទី៣០ ខែមិថុនា ឆ្នាំ២០២១ នេះ ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនពេលកើតហេតុគឺមានផ្ទៃមេឃខ្មៅអួអាប់ហើយក៏មានភ្លៀងមួយមេធំ លាយឡំនឹងខ្យល់កន្ត្រាក់ បណ្តាលឲ្យដើមឈើជាច្រើនដើម បានប៉ើងរលើងគល់ រលំជាបន្តបន្ទាប់ ។
ក្នុងនោះក៏មានកង់បីឥណ្ឌាចំនួន ៣គ្រឿងបានរងការខូចខាត ដោយសារត្រូវដើមឈើទាំងនោះបាក់សង្កត់ពីលើ និងបណ្តាលឲ្យស្ត្រីម្នាក់ ដែលទើបតែឆ្លងទន្លេរួច ចេញមកដកលុយ បណ្តាលឲ្យរងរបួសផងដែរ ។
បន្ទាប់ពីកើតហេតុក៏មានអាជ្ញាធរមូលដ្ឋាន និងមន្ត្រីជំនាញបានចុះមកកាប់រះដើមឈើយកចេញពីលើផ្លូវ ដើម្បីសម្រួលចរាចរណ៍ជូនបងប្អូនប្រជាពលរដ្ឋផងដែរ៕ អ៊ុ ស្រស់
