ខេត្តកណ្តាល៖ យោងតាមផេក« អធិការដ្ឋាននគរបាលស្រុក ល្វាឯម » ដែលបង្ហោះនៅវេលាម៉ោង ៨និង០៥នាទី ព្រឹកថ្ងៃទី១ ខែកក្កដា ឆ្នាំ២០២១ បានឲ្យដឹងថា ក្រុមអ្នកបើករថយន្តបែនដឹកថ្ម ចំនួន ៤គ្រឿង បានបើកប្រដេញគ្នាតាមដងផ្លូវ ជែងគ្នាផង ប្រដេញគ្នាផង មិនគិតពីសុវត្ថិភាពតាមដងផ្លូវទៅលើអ្នកដំណើរផ្សេងទៀត ត្រូវបានសមត្ថកិច្ចចាប់ឃាត់ខ្លួន យកមកតេស្តទឹកនោមរកសារធាតុញៀន ។

ការចាប់ឃាត់ក្រុមអ្នកបើករថយន្តដឹកដីទាំងនេះ គឺធ្វើឡើងនៅថ្ងៃទី៣០ ខែមិថុនា ឆ្នាំ២០២១ ។

ក្នុងនោះ សមត្ថកិច្ចជំនាញផ្នែកចរាចរណ៍ បានធ្វើការឃាត់រថយន្តដឹកថ្ម ចំនួន០៤គ្រឿង ដែលរថយន្តទាំងនេះ ដោយបើកក្នុងល្បឿនលឿន ប្រដេញគ្នា ក្នុងទីប្រជុំជន មិនគិតខ្លាចពីគ្រោះថ្នាក់ ទៅលើអ្នកដំណើរផ្សេងទៀតទាល់តែសោះ ។

មិនតែប៉ុណ្ណោះ សមត្ថកិច្ចក៏បានធ្វើការត្រួតពិនិត្យលើអ្នកបើកបរទាំងនេះ ពុំមានប័ណ្ណបើកបរ ថែមទាំងមានសារធាតុញៀនក្នុងខ្លួនទៀតផង ពេលនេះសមត្ថកិច្ចកំពុងអនុវត្តន៍តាមនិតិវិធីច្បាប់៕