ខេត្តកណ្ដាល ៖ ពិតជាសាហាវមែន! មានការភ្ញាក់ផ្អើលខ្លាំងមួយបានកើតឡើង ដោយ២នាក់ប្តីប្រពន្ធ កំពុងនៅក្នុងរោងចិញ្ចឹមទា ស្រាប់តែត្រូវបានខ្មាន់កាំភ្លើង ដែលជាជនដៃដល់ ចូលទៅបាញ់សម្លាប់ជាច្រើនគ្រាប់ បណ្តាលឲ្យប្រពន្ធស្លាប់នៅក្នុងថ្លុកឈាម ចំណែកប្តីរងរបួសធ្ងន់ធ្ងរ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ បង្កការភ្ញាក់ផ្អើលកាលពីវេលាម៉ោង ៥និង៣០នាទីព្រឹក ថ្ងៃទី៥ ខែកក្កដា ឆ្នាំ២០២១នេះ ក្នុងភូមិថ្មី ឃុំសន្លុង ស្រុកខ្សាច់កណ្ដាល ខេត្តកណ្ដាល។

សមត្ថកិច្ចបានឲ្យដឹងថា ២នាក់ប្ដីប្រពន្ធដែលត្រូវគេបាញ់នេះ រួមមាន ប្តីឈ្មោះ យឹម គឹមហុក អាយុ៤៥ឆ្នាំ (របួសធ្ងន់) , ចំណែកប្រពន្ធមានឈ្មោះ សុន ស្រឿន អាយុ៤៩ឆ្នាំ បានស្លាប់ក្នុងថ្លុកឈាមនៅទីតាំងកើតហេតុផ្ទាល់តែម្តង។

សមត្ថកិច្ចបានឲ្យដឹងទៀតថា នៅវេលាម៉ោង៨យប់ ថ្ងៃទី០៤ ខែកក្កដា ឆ្នាំ២០២១ ជនរងគ្រោះទាំង២នាក់ ប្តីប្រពន្ធបានឲ្យកូនប្រុសឈ្មោះ ហុក ភូណាន់ អាយុ១៧ឆ្នាំ ជិះម៉ូតូឌុបមកដេកនៅរោងទាដូចរាល់ថ្ងៃ ហើយកូនក៏ជិះម៉ូតូទៅផ្ទះវិញ។ លុះព្រឹកនេះកូនក៏ជិះម៉ូតូមករោងទា ដើម្បីមកជួយរើសពងទាឪពុកម្តាយ ស្រាប់តែឃើញម្ដាយស្លាប់ក្នុងថ្លុកឈាមទៅហើយ ចំណែកប្ដីរបួសធ្ងន់ឈាមពេញខ្លួន ទើបប្រញាប់មករាយការណ៍ជូនសមត្ថកិច្ច ហើយភ្លាមៗសមត្ថកិច្ចប៉ុស្តិ៍ បានចុះដល់កន្លែងកើតហេតុធ្វើការព័ទ្ធ រកឃើញសំបកគ្រាប់កាំភ្លើង ចំនួន១០គ្រាប់ និងមានស្នាមកាប់ជញ្ជាំងស័ង្កសី ចំនួន០២កន្លែង ផងដែរ ពេលនេះសមត្ថកិច្ចកំពុងស្រាវជ្រាវយ៉ាងយកចិត្តទុកដាក់ ៕