រាជធានីភ្នំពេញ ៖ រថយន្តបែនដឹកឥដ្ឋធន់ធំ មួយគ្រឿងបើកចូលការដ្ឋានអគារសំណង់ មួយកន្លែងបម្រុងចូលដាក់ឥដ្ឋ ស្រាប់តែអិលថយក្រោយបុកចំម៉ូតូប៉ូលីសចរាចរណ៍នៅគោលដៅចំនួន២គ្រឿងរួមនិងទ្វារបងផ្ទះប្រជាពលរដ្ឋក្បែរនោះ តែសំណាងល្អមិនបណ្ដាលអោយមានមនុស្សរងរបួសឡើយ។

ហេតុការណ៍នេះកើតឡើងកាលពីវេលាម៉ោង១២ថ្ងៃត្រង់ថ្ងៃទី០៥ ខែកក្កដា ឆ្នាំ២០២១ នៅចំណុចស្ដុបវត្តនាគវ័ន តាមបណ្ដោយមហាវីថីសហព័ន្ធរុស្សី កែងផ្លូវលេខ២២១ សង្កាត់ផ្សារដេប៉ូទី៣ ខណ្ឌទួលគោក ។

តាមប្រភពព័ត៌មានពីមន្រ្តីប៉ូលីសចរាចរណ៍នៅគោលដៅបានអោយដឹងថា នៅមុនពេលកើតហេតុ មានរថយន្តកូរ៉េ១គ្រឿង ពណ៌ខៀវ ពាក់ស្លាកលេខ ពោធិ៍សាត់ 3A-0198 ធន់ធំ ដឹកឥដ្ឋគោលបំណងចូលទំលាក់ឥដ្ឋនៅអគាខុនដូរខ្ពស់មួយកន្លែងនៅជាកែងស្តុបតែម្ដង តែខណៈពេលរយ័រថយន្តថយ ជាន់ហ្វ្រាំងមិនជាប់ រអិលថយក្រោយបានជាន់ម៉ូតូរបស់ប៉ូលីសនៅប្រចាំការគោលដៅខូចខាតចំនួន២គ្រឿង និងបាក់របងផ្ទះប្រជាពលរដ្ឋ ប៉ុន្តែសំណាងល្អមិនបណ្ដាលអោយមានមនុស្សរងរបួសឡើយ។

ក្រោយពេលកើតហេតុ ខាងសមត្ថកិច្ចខូចខាតម៉ូតូ ម្ចាស់ផ្ទះខូចខាតរបងផ្ទះ ត្រូវបានខាងរថយន្តសុំសម្របសម្រួលសិនតែបើពុំត្រូវគ្នានោះទេនឹងធ្វើការវាស់វែង ដោះស្រាយតាមនីតិវិធី៕