រាធានីភ្នំពេញ៖ ដើមឈើនៅតាមបណ្ដោយមហាវិថីសហព័ន្ធរុស្ស៊ីក្នុងខណ្ឌទួលគោកត្រូវបានរលំបាក់សង្កត់មកលើផ្លូវ ក្រោយពីមានភ្លៀងមួយមេធំលាយឡំជាមួយនឹងខ្យល់កន្ត្រាក់។ ហេតុការណ៍នេះបានកើតឡើងកាលពីវេលាម៉ោង ១១និង៥០នាទីថ្ងៃត្រង់ ថ្ងៃទី០៥ ខែកក្កដាឆ្នាំ២០២១ ដែលស្ថិតនៅចំណុចទល់មុខសកលវិទ្យាល័យភូមិន្ទភ្នំពេញ តាមបណ្ដោយមហាវិថីសហព័ន្ធរុស្សី ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។
យោងតាមប្រភពព័ត៌មានបានឲ្យដឹងថា នៅមុនពេលកើតហេតុ គេបានឃើញមេឃខ្មៅអួអាប់ ខណៈនោះ ស្រាប់តែមានភ្លៀងមួយមេធំលាយឡំជាមួយនឹងខ្យល់កន្ត្រាក់បានធ្វើឲ្យដើមឈើដែលស្ថិតនៅតាមបណ្ដោយផ្លូវសហព័ន្ធរុស្សីបាក់រលំសង្កត់ពាក់កណ្ដាលផ្លូវ តែសំណាងល្អមិនបណ្ដាលអោយមានអ្នកធ្វើដំណើរងរបួសឡើយ។
ក្រោយពីមានហេតុការណ៍បាក់ដើមឈើរលំសង្កត់នេះរួចមក មន្ត្រីអាជ្ញាធរមូលដ្ឋានបានទាក់ទងទៅអាជ្ញាធរជំនាញក្រសួងសាធារណការ ចុះមកកាប់រះដើមឈើយកចេញពីលើផ្លូវ ដើម្បីសម្រួលដល់ការធ្វើដំណើរជូនបងប្អូនប្រជាពលរដ្ឋឡើងវិញ ជៀសវាងបង្កការកក់ស្ទះចរាចរណ៍៕
