រាជធានីភ្នំពេញ៖ គ្រោះថ្នាក់ចរាចរណ៍មួយបានកើតឡើង រវាងរថយន្តស៊េរីទំនើបមួយគ្រឿង បានបុកជាមួយនឹងរថយន្ដ RAV-4 បណ្តាលឲ្យរងការខូចខាតទាំងសង្ខាង កាលពីវេលាម៉ោង ២រំលងអធ្រាត្រ ឈានចូលថ្ងៃទី៧ ខែកក្កដា ឆ្នាំ២០២១ នៅតាមបណ្ដោយផ្លូវព្រះនរោត្តម ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

តាមប្រភពព័ត៌មាន ពីភាគីមួយចំហៀង បានឲ្យដឹងថា មុនពេលកើតហេតុគាត់បានបើករថយន្តមួយគ្រឿងម៉ាកRAV-4 ពាក់ស្លាកលេខភ្នំពេញ 2BB-3643 តាមផ្លូវព្រះនរោត្តម ក្នុងទិសដៅពីត្បូងទៅជើង លុះមកដល់ចំណុចកើតហេតុ ក៏មានរថយន្តស៊េរីទំនើបមួយគ្រឿង ពាក់ស្លាកលេខ កម្ពុជា XYL-1818 បើកបរដោយជនជាតិចិន ក្នុងទិសដៅពីកើតមកលិច មកដល់ផ្លូវបំបែកជាបួន មុខស្ពាននាគ វត្តភ្នំ ក៏បានបុកគ្នាពេញមួយទំហឹង បានឲ្យរថយន្ដទាំង២គ្រឿង រងការខូចខាតទាំងសងខាង ភ្លាមនោះដោយសារតែម្ចាស់រថយន្ដនិយាយមិនត្រូវគ្នា ក៏ឲ្យសមត្ថកិច្ចមូលដ្ឋាន ទាក់ទងទៅកាន់សមត្ថកិច្ចជំនាញចរាចរណ៍ផ្លូវគោក របស់ស្នងការនគរបាលរាជធានីភ្នំពេញ ដើម្បីធ្វើការវាស់វែង និងស្ទូចរថយន្តទាំង២គ្រឿង យកទៅទុកក្នុងស្នងការរដ្ឋានគរបាលរាជធានីភ្នំពេញ រង់ចាំការដោះស្រាយគ្នាទៅតាមផ្លូវច្បាប់បន្តទៀត ៕