ខេត្តបាត់ដំបង ៖ ជនសង្ស័យម្នាក់ ត្រូវបានសមត្ថកិច្ចចាប់ឃាត់ខ្លួន ក្រោយទាស់ពាក្យសម្តីជាមួយប្រពន្ធ ចិត្តក្តៅទាញកាំភ្លើងដែលខ្លួនបានទិញទុក យកមកគំរាមបាញ់សម្លាប់ប្រពន្ធ កាលពីវេលាម៉ោង៧យប់ ថ្ងៃទី៥ ខែកក្កដា ឆ្នាំ២០២១ នៅភូមិរូង២ ឃុំព្រៃត្រឡាច ស្រុករុក្ខគិរី ខេត្តបាត់ដំបង

សមត្ថកិច្ចបានឲ្យដឹងថា ជនសង្ស័យមានឈ្មោះ ហ៊ាន វុទ្ធី ភេទប្រុស អាយុ៤៩ឆ្នាំ រស់នៅក្នុងភូមិខាងលើ ត្រូវបានចាប់ឃាត់ខ្លួន បន្ទាប់ពីបានប្រើប្រាស់អាវុធដោយខុសច្បាប់ និងប្រើប្រាស់អាវុធគំរាមសម្លាប់ប្រពន្ធ របស់ខ្លួន ដោយដកហូតអាវុធខ្លីប្រភេទK59 ចំនួន ០១ដើម គ្រាប់ចំនួន ០២គ្រាប់នៅក្នុងបង់ ស្រាប់។

សមត្ថកិច្ចបានឲ្យដឹងទៀតថា ដោយសារតែប្រពន្ធមានការភ័យខ្លាច បានរត់ចេញពីផ្ទះ និងរាយការណ៍ភ្លាមដល់សមត្ថកិច្ច ទើបចុះទៅឃាត់ខ្លួនបុរសជាប្តីនោះតែម្តង ។

ក្នុងនោះ ជនសង័្សយឈ្មោះ ហ៊ាន វុទ្ធី បានឆ្លើយសារភាពថា អាវុធខ្លីមួយដើម ដែលរូបគាត់យកមកប្រើប្រាស់គំរាមសម្លាប់ប្រពន្ធនេះ គឺគាត់បានទិញពីអ្នកនៅភ្នំពេញម្នាក់ ដែលគាត់បានស្គាល់ ហើយព្រោះតែការស្រឡាញ់អាវុធនេះពេក ទើបគាត់ទិញយកមក ។

ពេលនេះជនសង្ស័យខាងលើរួមទាំងវត្ថុតាង ត្រូវបានសមត្ថកិច្ចធ្វើការសាកសួរ និងកសាងសំណុំរឿងចាត់ការតាមច្បាប់បន្តទៀត៕ ប្រភព៖ ស្នងការដ្ឋាននគរបាលខេត្តបាត់ដំបង