កំពង់ស្ពឺ៖ យ៉ាងហោចណាស់ យុវជនម្នាក់ បានស្លាប់យ៉ាងរន្ធត់ ខណៈម្នាក់ទៀតរងរបួសស្រាល ក្រោយជិះម៉ូតូឌុបគ្នាក្នុងល្បឿនលឿន ទៅបុកបង្កាន់ដៃស្ពាន រហូតផ្លោងម៉ូតូធ្លាក់ចុះមកខាងក្រោមស្ពានវិញ កាលពីវេលាម៉ោង ១០ និង២០នាទី ថ្ងៃទី១៧ ខែមីនា ឆ្នាំ២០២១ លើផ្លូវក្រាលកៅស៊ូ ភូមិជ័យថ្មី ឃុំព្រៃក្មេង ស្រុកភ្នំស្រួច ខេត្តកំពង់ស្ពឺ ។

របាយការណ៍សមត្ថកិច្ចបញ្ជាក់ថា មុនពេលកើតហេតុ គេឃើញមានម៉ូតូ១គ្រឿង ម៉ាកហុងដាសេ១២៥ពណ៌ខ្មៅ ផលិតឆ្នាំ២០១៧ ពាក់ស្លាកលេខ កំពង់ស្ពឺ 1J-9634 បើកបរដោយឈ្មោះ យ៉ន អ៊ួក ភេទប្រុស អាយុ១៦ឆ្នាំ នៅភូមិពង្រ ឃុំស្វាយចចឹប ស្រុកបសេដ្ឋ ឌុបឈ្មោះ អ៊ុ គី ភេទប្រុស អាយុ១៦ឆ្នាំ នៅភូមិឃុំជាមួយគ្នា ទិសដៅពីត្បូងទៅជើង ដល់ចំណុចខាងលើ បានបុកបង្កាន់ដៃ ស្ពានបណ្តាលឲ្យអ្នកអ្នកបើកបរម៉ូតូស្លាប់ នៅនឹងកន្លែងកើតហេតុ និងអ្នកជិះពីក្រោយរងរបួសស្រាល ។

ក្រោយកើតហេតុ សមត្ថកិច្ចបានធ្វើការវាស់វែង យកម៉ូតូទៅរក្សាទុក នៅប៉ុស្តិ៍នគរបាលរដ្ឋបាលព្រៃក្មេង ដើម្បីដោះស្រាយគ្នាតាមច្បាប់ ។ ចំណែកសាកសពត្រូវបានសមត្ថកិច្ចធ្វើកំណត់ហេតុ ប្រគល់ឲ្យសាច់ញាតិធ្វើបុណ្យតាមប្រពៃណី៕