ខេត្តឧត្តរមានជ័យ ៖ ជនសង្ស័យចំនួន២នាក់ ធ្វើសកម្មភាពលួចកាច់សោរកយកម៉ូតូចំនួន០១គ្រឿង របស់ប្រជាពលរដ្ឋ ត្រូវបានសមត្ថកិច្ចស្រុក ត្រពាំងប្រាសាទ សហការជាមួយកម្លាំងយោធាវរសេនាតូចអន្តរាគមន៍លេខ២៦២ នៃកងពលតូចអន្តរាគមន៍លេខ៦ ចុះធ្វើការបង្ក្រាបនិងចាប់ឃាត់ខ្លួនបាន កាលពីវេលាម៉ោង ៥និង៣០នាទី ថ្ងៃទី៦ ខែកក្កដា ឆ្នាំ២០២១ នៅចំណុចក្បែរទីបញ្ជាការវរៈសេនាតូចអន្តរាគមន៍២៦២ ស្ថិតក្នុងភូមិអូររំដេង ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ។

សមត្ថកិច្ចបានឲ្យដឹងថា ជនសង្ស័យរួមមាន៖

ទី១. ឈ្មោះ ឈុន ឆៃវ៉េ ភេទប្រុស អាយុ ២៨ឆ្នាំ រស់នៅភូមិស្រែក្រសាំង ឃុំ-ស្រុកត្រពាំងប្រាសាទ ខេត្តឧត្តរមានជ័យ ។

ទី២. ឈ្មោះ អាង សម្បត្តិ ភេទប្រុស អាយុ ៤០ឆ្នាំ ស្នាក់នៅភូមិត្រាំប៉ោង ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ ។

ក្នុងនោះ សមត្ថកិច្ចដកហូតបានវត្ថុតាងរួមមាន ៖ ម៉ូតូ ០១ គ្រឿង និង សម្ភារៈសម្រាប់កាច់សោរកម៉ូតូមួយចំនួនទៀត ។

បច្ចុប្បន្នជនសង្ស័យខាងលើ ត្រូវបានការិយាល័យជំនាញរៀបចំកសាងសំណុំរឿងបញ្ជូនទៅតុលាការចាត់ការបន្តតាមនីតិវិធីរួចរាល់ ហើយក៏ត្រូវបានចៅក្រមស៊ើបសួរចេញដីការបង្គាប់ឲ្យឃុំខ្លួនបណ្ដោះអាសន្ន នៅពន្ធនាគារខេត្តឧត្តរមានជ័យ បទល្មើសដែលមានចែងឱ្យផ្តន្ទាទោសតាមបទបញ្ញត្តិមាត្រា ៣៥៣ និង ៣៥៦ នៃក្រមព្រហ្មទណ្ឌ ៕