ខេត្តតាកែវ ៖ ពិតជារន្ធត់ណាស់ យ៉ាងហោចណាស់មនុស្ស២នាក់ បានស្លាប់ខ្ទេចដៃខ្ទេចជើងយ៉ាងរន្ធត់ និង២នាក់ទៀត រងរបួសធ្ងន់ស្រាល ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ក្នុងករណីគ្រោះថ្នាក់ចរាចរណ៍រវាងម៉ូតូ និងរថយន្ត និងម៉ូតូសណ្តោងរ៉ឺម៉ក ដែលជិះបញ្ច្រាស់ទិសគ្នាពេញទំហឹង កាលពីវេលាម៉ោង ៥ និង១០នាទីព្រឹក ថ្ងៃទី១២ ខែកក្កដា ឆ្នាំ២០២១ នៅចំណុចលើផ្លូវជាតិលេខ៣ ចន្លោះបង្គោលគីឡូម៉ែត្រលេខ ៤២-៤៣ ភូមិត្រាំខ្នារ ឃុំសូភី ស្រុកបាទី ខេត្តតាកែវ ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ បានកើតឡើងរវាងម៉ូតូមួយគ្រឿង ពណ៌ក្រហម ពាក់ស្លាកលេខ កំពង់ស្ពឺ 1O-9919 បើកបរក្នុងទិសដៅពីត្បូង ដោយឈ្មោះ អិន ធីវ៉ាន ភេទស្រី អាយុ៣៥ឆ្នាំ មុខរបរកសិករ ស្នាក់នៅភូមិត្រពាំងមាន ឃុំស្នំក្រពើ ស្រុកគងពិសី ខេត្តកំពង់ស្ពឺ (ស្លាប់នៅនឹងកន្លែង) និងមានអ្នករួមដំណើរឈ្មោះ អេស រស្មី ភេទស្រី អាយុ១៤ឆ្នាំ ស្នាក់នៅភូមិជាមួយគ្នា (ស្លាប់ដូចគ្នា) ។

ចំណែកភាគីរថយន្តម៉ាក តូយ៉ូតា ពណ៌ប្រផេះ ពាក់ស្លាកលេខ ពោធិ៍សាត់ 2A-0682 (អ្នកបើកបររត់បាត់) បានក្រឡាប់អូសផ្ងារជើង ។ ចំណែកម៉ូតូសណ្តោងរ៉ឺម៉ក ម៉ាកហុងដាសេ១២៥ ពណ៌ខ្មៅ គ្មានផ្លាកលេខ បើកបរពីជើង ដោយឈ្មោះ មិនម៉ាន់ផង់ ភេទប្រុស អាយុ២២ឆ្នាំ មុខរបរកសិករ រងរបួសធ្ងន់ ស្នាក់នៅភូមិសង្កែ ឃុំសៀមខ្វៀង ស្រុកកំចាយមា ខេត្តព្រៃវែង និងប្រពន្ធឈ្មោះ ផេង ស្រីលីន អាយុ២៣ឆ្នាំ របួសស្រាល ។

ចំណែកមូលហេតុ សមត្ថកិច្ចបានឲ្យដឹងថា គឺបណ្តាលមកពីម៉ូតូបើកបរមិនប្រកាន់ស្តាំ ទើបកើតហេតុការណ៍បែបនេះ ។

ក្រោយកើតហេតុ សមត្ថកិច្ចនគរបាលមូលដ្ឋាន សហការជាមួយនគរបាលជំនាញ ចុះធ្វើការវាស់វែង យករថយន្ត ម៉ូតូ និងរម៉ក ទៅរក្សាទុក រង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕