រាជធានីភ្នំពេញ ៖ មានការភ្ញាក់ផ្អើលទាំងយប់មួយបានកើតឡើង ដោយយុវជនម្នាក់ ត្រូវបានក្រុមជនដៃដល់មិនស្គាល់មុខ មកកាប់ដល់ផ្ទះ បណ្តាលឲ្យរងរបួសយ៉ាងធ្ងន់ធ្ងរ ផ្អើលដល់សមត្ថកិច្ចចុះអន្តរាគមន៍ដល់កន្លែងកើតហេតុ កាលពីវេលាម៉ោងជិត១១យប់ ថ្ងៃទី១២ ខែកក្កដា ឆ្នាំ២០២១ នៅខាថក្រោយវត្តសារាវ័ន្តតេជោ ភូមិ៤ សង្កាត់ជ័យជំនះ ខណ្ឌដូនពេញ រាជធានីភ្នំពេញ។

តាមប្រភពព័ត៌មានពីកន្លែងកើតហេតុ បានឲ្យដឹងថា ជនសង្ស័យមួយក្រុមនោះ បានដេញតាមកាប់យុវជនដែលមានឈ្មោះហៅក្រៅ ក្រញាញ់ អាយុ ៣០ឆ្នាំជាង ស្នាក់នៅម្ដុំផ្សារតាប៉ាង បណ្ដាលឲ្យរងរបួសធ្ងន់ បន្ទាប់ពីជនរងគ្រោះមិនព្រមយកម៉ូតូដែលមិនស្គាល់ប្រភពច្បាស់លាស់យកទៅប្រចាំឲ្យ ទើបក្រុមបងធំទាំងនោះ ខឹងក៏នាំគ្នាយកដំបងនិងដាវសាំម៉ូរ៉ៃ ដេញកាប់ជនរងគ្រោះរត់ឡើងដល់លើផ្ទះ ហើយនៅតែតាមទៅវាយបំបែកសោចូលទៅកាន់ទាល់តែបានទៀត បណ្ដាលឲ្យរងរបួសធ្ងន់ នៅលើផ្ទះជាន់ទី២ ដេកក្នុងថ្លុកឈាម ត្រូវបានបងប្អូនប្រជាពលរដ្ឋជួយហៅរថយន្ដសង្រ្គោះ ដើម្បីមកយកទៅសង្គ្រោះបន្ទាន់នៅមន្ទីរពេទ្យ។

ក្រោយពេលកើតហេតុ សមត្ថកិច្ចបានមកដល់បាន ដោយជួយអន្តរាគមន៍ឲ្យជនរងគ្រោះទៅសង្គ្រោះនៅមន្ទីរពេទ្យសិន ចាំមកដាក់ពាក្យបណ្តឹងតាមក្រោយ ដើម្បីសមត្ថកិច្ចងាយស្រួលកំណត់អត្តសញ្ញាណតាមចាប់ជនសង្ស័យជាជនដៃដល់ខាងលើ យកមកផ្តន្ទាទោសតាមច្បាប់បន្តទៀត៕