រាជធានីភ្នំពេញ ៖ នារីម្នាក់បានរងរបួសធ្ងន់ និងម្នាក់ទៀតរបួសស្រាល ខណ:កំពុងតែជិះម៉ូតូចេញទៅធ្វើការ ត្រូវរថយន្តដឹកស៊ីម៉ង់ត៍មួយគ្រឿង រអិលមកក្រោយ កិនម៉ូតូជនរងគ្រោះទាំងកំរោល បង្កឲ្យមានការភ្ញាក់ផ្អើលទៅដល់បងប្អូនប្រជាពលរដ្ឋ រាយការណ៍ជូនកម្លាំងសមត្ថកិច្ច ហៅរថយន្តសាមុយ ដឹកយកទៅសង្រ្គោះភ្លាមៗ កាលពីវេលាម៉ោង៧និង២៥នាទីព្រឹក ថ្ងៃទី១៣ ខែកក្កដា ឆ្នាំ២០២១ ស្ថិតនៅភូមិក្បាលទំនប់ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។

បើតាមប្រភពព័ត៌មានពីបងប្អូនប្រជាពលរដ្ឋ បានបញ្ជាក់ប្រាប់ក្រុមការងារ TVFB បានឲ្យដឹងថា មុនពេលកើតហេតុ គេឃើញរថយន្តកូរ៉េដឹកស៊ីម៉ង់ត៍មួយគ្រឿង ពេញលើរថយន្ត បើកចេញពីដេប៉ូលក់គ្រឿងសំណង់ ក្បែរកន្លែងកើតហេតុ ខណៈបើកឡើងចំណោតមិនរួច ស្របពេលនោះក៏មាននារី២នាក់ កំពុងតែជិះម៉ូតូឌុបគ្នាមកពីក្រោយ ស្រាប់តែរថយន្តដឹកស៊ីម៉ង់ត៍នោះរអិល ចុះមកកិនចំពីក្រោយចំហៀងខាងស្តាំរថយន្ត បណ្តាលឲ្យរងបួសធ្ងន់ម្នាក់ និងស្រាលម្នាក់ ភ្លាមៗនោះដែរ ម្ចាស់ដេប៉ូខាងលើព្យាយាម យករថយន្តបង្កនិងម៉ូតូជនរងគ្រោះ ចូលទៅក្នុងការដ្ឋានរបស់ខ្លួន។ ចំណែកឯនារីរងគ្រោះទាំង២នាក់ខាងលើ ក៏ត្រូវបានបញ្ជូនតាមរថយន្តសាមុយ របស់មន្ទីរពេទ្យឯកជនដឹកយកទៅធ្វើការសង្រ្គោះភ្លាមៗផងដែរ។

ក្រោយពេលកើតហេតុ កម្លាំងជំនាញនគរបាលចរាចរណ៍ខណ្ឌមានជ័យ ចុះមកទីតាំងខាងលើបានការវាស់វែង និងធ្វើកំណត់ហេតុ ដោយខាងភាគីម្ចាស់រថយន្តកូរ៉េខាងលើធានារ៉ាប់រងសងថ្លៃព្យាបាល ដល់ជនរងគ្រោះទាំង២នាក់ដើម្បីបញ្ចប់រឿងតែម្តង៕