ខេត្តកណ្តាល ៖ ស្ត្រីម្នាក់ ជាម្ចាស់កាបូប និងជាជនរងគ្រោះ បានរត់ភ័យស្លន់ស្លោរ មកកាន់ប៉ុស្តិ៍សមត្ថកិច្ច ក្រោយត្រូវបានជនដៃដល់ ដែលជាជើងខ្លាំងជំនាញខាងឆក់ កក្រើកក្រុងតាខ្មៅ និងភ្នំពេញ ឆក់កាបូបហើយជិះរត់ តែត្រូវបានសមត្ថកិច្ចដេញចាប់ខ្លួនបានភ្លាមៗ កាលពីវេលាម៉ោង ៩និង៣០នាទី ថ្ងៃទី១៤ ខែកក្កដា ឆ្នាំ២០២១ នៅចំណុចផ្លូវ២០៦ ភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល ។

សមត្ថកិច្ចបានឲ្យដឹងថា ជនរងគ្រោះមានឈ្មោះស៊ន ស្រីនាង ភេទស្រី អាយុ៣១ឆ្នាំ ស្នាក់នៅបុរីពិភពថ្មី២ ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរបុគ្គលិកក្រុមហ៊ុនBIM។ ចំណែកជនសង្ស័យមានឈ្មោះ គឹម មនោរម្យ ហៅណូ ភេទប្រុស អាយុ២៤ឆ្នាំ ស្នាក់ភូមិព្រែកឫស្សី សង្កាត់ព្រែកឫស្សី ក្រុងតាខ្មៅ ខេត្តកណ្តាល មុខរបរ មិនពិតប្រាកដ(ឃាត់ខ្លួន) ដកហូតបាន ម៉ូតូ១គ្រឿងម៉ាក HONDA ១២៥ ពណ៌ខ្មៅ ស៊េរីឆ្នាំ២០២១ ផ្លាកលេខ ភ្នំពេញ1IS-3509 (របស់ជនសង្ស័យជិះធ្វើសកម្មភាព), កាបូបយួរដៃពណ៌ឈាមជ្រូកចំនួន១, កាបូបដៃពណ៌ឈាមជ្រូកចំនួន១(របស់ជនរងគ្រោះ) , ទូរស័ព្ទដៃចំនួន២គ្រឿង(ម៉ាកiphone.Xs max ពណ៌មាស និងម៉ាក meitu ពណ៌ស លាយផ្កាឈូក ) របស់ជនរងគ្រោះ។

សមត្ថកិច្ចបានឲ្យដឹងទៀតថា ពេលដែលជនរងគ្រោះ កំពុងតែជិះម៉ូតូ២នាក់ ប្តីប្រពន្ធ ដោយប្តីជាអ្នកឌុបតាមផ្លូវលេខ២០៦ ឆ្ពោះទៅកន្លែងធ្វើការនៅភ្នំពេញ ដល់ត្រង់កន្លែងកើតហេតុ ស្រាប់តែមានជនសង្ស័យខាងលើជិះម៉ូតូ១គ្រឿងមកពីក្រោយ ដល់ទន្ទឹមរួចធ្វើសកម្មភាពឆក់កាបូបយួរដៃរបស់ជនរងគ្រោះកាន់ដាក់លើភ្លៅ រួចជិះម៉ូតូគេចខ្លួន ភ្លាមនោះជនរងគ្រោះជិះម៉ូតូដេញតាមស្រែកថាចោរៗផ្អើលដល់ប្រជាពលរដ្ឋ ទើបកម្លាំងសមត្ថកិច្ចនគរបាលក្រុងតាខ្មៅជួយអន្តរាគមន៍ដេញស្ទាក់ចាប់ឃាត់ខ្លួនជនសង្ស័យបានរួមទាំងវត្ថុតាងបញ្ជូនមកកាន់អធិការដ្ឋាននគរបាលក្រុងតាខ្មៅដើម្បីធ្វើការសាកសួរនិងកសាងសំណុំរឿងតាមនីតិវិធី។

សូមបញ្ជាក់ថាជនសង្ស័យខាងលើមានដីកាបង្គាប់អោយចាប់ខ្លួនរបស់សាលាដំបូងខេត្តកណ្តាលលេខ២៩៦ ដកបចខ ចេញដោយចៅក្រមស៊ើបសួរ ជួន វណ្ណ: ចុះថ្ងៃទី១១ ខែឧសភា ឆ្នាំ២០២០ ពីបទលួចមានស្ថានទម្ងន់ទោស ប្រព្រឹត្តនៅភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល កាលពីថ្ងៃ២៣ ខែមីនា ឆ្នាំ២០២០៕