រាជធានីភ្នំពេញ៖ ស្ត្រីម្នាក់ បានរងរបួសដួលបាក់ដងកាំបិត ត្រូវបានបញ្ជូនទៅសង្គ្រោះនៅមន្ទីរពេទ្យ ខណៈជិះម៉ូតូតាមដងផ្លូវ ត្រូវបានចោរធ្វើសកម្មភាពឆក់កាបូបស្ពាយ យកទៅបាត់ នៅលើស្ពានអាកាសផ្សារដីហុយ កាលពីព្រឹកព្រលឹមវេលាម៉ោង ៦ និង១៥នាទី ថ្ងៃទី១៥ ខែកក្កដា ឆ្នាំ២០២១នេះ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

តាមសម្តីជនរងគ្រោះបាននិយាយថា ខ្លួនមានឈ្មោះ អ៊ុក ស្រីស្រស់ អាយុ២៧ឆ្នាំ មុខរបរកម្មការិនីរោងចក្រ បានជិះម៉ូតូម៉ាក ហុងដាឃ្លីក ពណ៌ក្រហម ពាក់ស្លាកលេខ ភ្នំពេញ1HK-4582 ឡើងលើស្ពានអាកាសផ្សារដីហុយ ពីកើតទៅលិច លុះដល់ជិតនិងវិទ្យាល័យ១០០ខ្នង ស្រាប់តែមានជនសង្ស័យ បានមកធ្វើសកម្មភាពឆក់កាបូបរបស់គាត់បានសម្រេច ដែលក្នុងកាបូបនោះ មានទូរសព្ទ iPhone 11 Pro មួយគ្រឿង , លុយខ្មែរ៨ម៉ឺនរៀល និងដុល្លារ ៣០ដុល្លារផងដែរ ។

ជនរងគ្រោះបានរៀបរាប់ទាំងភ័យទៀតថា ពេលឆក់នោះ គាត់បានដួលម៉ូតូទៅលើផ្លូវ បណ្តាលឲ្យបាក់ដងកាំបិតខាងឆ្វេង ។ ចំណែកជនសង្ស័យ បានយកកាបូបគាត់ជិះរត់គេចខ្លួនបាត់ តែម្តង ។

ភ្លាមៗសមត្ថកិច្ចនគរបាលមូលដ្ឋានក៏មកដល់ ដោយបានទាក់ទងហៅរថយន្តសាមុយ មកដឹកជនរងគ្រោះទៅសង្គ្រោះព្យាបាលនៅមន្ទីរពេទ្យ រួចឲ្យជនរងគ្រោះទៅដាក់ពាក្យបណ្តឹងតាមក្រោយ ដើម្បីសមត្ថកិច្ចស្រាវជ្រាវរកជនសង្ស័យទាំងនោះ មកចាត់ការតាមច្បាប់បន្តទៀត៕