រាជធានីភ្នំពេញ៖ គ្រោះថ្នាក់ចរាចរណ៍ដ៏រន្ធត់មួយបង្កឡើងដោយរថយន្តស៊េរីទំនើបម៉ាកRC200t មួយគ្រឿង បើកបរដោយក្មេងប្រុសម្នាក់ ក្នុងល្បឿនលឿនដូចហោះ រេចង្កូតមកបុក ម៉ូតូរម៉កលក់ភេសជ្ជៈ បណ្តាល ស្ត្រីម្នាក់របួសត្រូវជើងទាំងសងខាង ហើយរថយន្តបន្តល្បឿនបុកម៉ូតូធូដេមួយគ្រឿង របួសធ្ងន់បុរសម្នាក់។ ឯរថយន្តបង្កបន្តដំណើរបើកគេចរហូតមកបុកម៉ូតូ មួយគ្រឿងទៀត រងរបួសបាក់ជើងខាងស្តាំ រួចក៏បើកទៅបុកគំរបលូ កល់ជាប់ទៅមុខលែងរួច ភ្លាមៗម្ចាស់រថយន្តបង្កបានរត់គេចខ្លួនចូលក្នុងផ្សារ TK បាត់តែម្តង កាលពីវេលាម៉ោង៣រសៀល ថ្ងៃទី១៥ ខែកក្កដា ឆ្នាំ២០២១ ផ្លូវ២៨៣ កែងផ្លូវ៥២៨ ក្នុងសង្កាត់បឹកក់ទី១ ខណ្ឌទួលគោក រាជធានីភ្នំពេញ។

យោងតាមប្រភពព័ត៌មានពីសាក្សីនៅកន្លែងកើតហេតុបានប្រាប់ឲ្យដឹងថា មុនពេលកើតហេតុ គេបានឃើញរថយន្ត មួយគ្រឿងម៉ាកឡិចស៊ីស RC200t ពណ៌ស ពាក់ស្លាកលេខ ភ្នំពេញ 2BN-6465 បើកបរចេញពីក្នុងបឹងកក់តាមបណ្តោយផ្លូវ២៨៣ កែងផ្លូវ៥២៨ ក្នុងល្បឿនលឿន ហើយក៏ជ្រុលទៅបុកជានិងម៉ូតូរម៉កលក់ភេសជ្ជៈ មួយគ្រឿង ភ្លាមៗនោះស្ត្រីជាអ្នកលក់ក៏ឃើញទាន់ស្ទុះរត់គេចតែមិនផុតក៏បុកត្រូវជើងទាំងសងខាង តែរថយន្តមិនទាន់អស់ល្បឿនក៏ជ្រុលទៅបុកបុរសម្នាក់ទៀតដែលអង្គុយលើម៉ូតូឈប់ទិញភេសជ្ជៈ បណ្តាលឲ្យរងរបួសបែកក្បាលយ៉ាងដំណំ។ ចំណែករថយន្តបានព្យាយាមគេចខ្លួនរហូតមកដល់ចំណុចស្តុបក្បែរនិងធានាគារABA ក៏បានបុកជាមួយម៉ូតូ មួយគ្រឿង ទៀត ម៉ាកឌ្រីមសេ១២៥មួយគ្រឿងទៀត បណ្តាលឲ្យស្ត្រី២នាក់រងរបួសធ្ងន់ស្រាល រួចរថយន្តក៏បានបន្តបើករត់គេចថែមទៀតរហូតមកដល់ចំណុចមុខផ្សារ TK ក៏បានទៅបុកនឹងគំរបលូកុលជាប់ទៅមុខលែងរួច ហើយបើកទ្វារថយន្តរត់គេចខ្លួនចូលទៅក្នុងផ្សារបាត់ស្រមោល។

ក្រោយកើតហេតុ សមត្ថកិច្ចប៉ុស្តិ៍បានចុះមកដល់ទីតាំងកើតហេតុ និងបានរាយការណ៍ទៅកាន់សមត្ថកិច្ចជំនាញចរាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីចុះមកធ្វើការវាស់វែងយករថយន្តបង្ក រួមនិងម៉ូតូជនរងគ្រោះទាំងអស់ ទៅទុកនៅការិយាល័យនគរបាលចរចរាណ៍ជើងគោក ដើម្បីរង់ចាំដោះស្រាយគ្នាតាមផ្លូវច្បាប់។ ចំណែកឯ ជនបង្កសមត្ថកិច្ចកំពុងសហការជាមួយសន្តិសុខផ្សារ ដើម្បីឃាត់ខ្លួនយកមកដាក់ទោសតាមផ្លូវច្បាប់ផងដែរ៕