រាជធានីភ្នំពេញ ៖ ជនសង្ស័យ២នាក់ ធ្វើសកម្មភាពទាក់ឆ្កែរបស់ប្រជាពលរដ្ឋ អស់លក្ខណ៍ត្រូវបានសមត្ថកិច្ចខណ្ឌចំការមនចាប់ឃាត់ខ្លួនបានទាំងកណ្ដាលរាត្រី បង្កការភ្ញាក់ផ្អើលនៅវេលាម៉ោង៣ទៀបភ្លឺ ឈានចូលថ្ងៃទី១៦ ខែកក្កដា ឆ្នាំ២០២១ នៅផ្លូវ ៤៣០ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។

ជនសង្ស័យទី១ ឈ្មោះ តាំង វិត ភេទ ប្រុស អាយុ ៤៣ឆ្នាំ មុខរបរ ទាក់ឆ្កែ ស្នាក់នៅភូមិ៥ (គល់ស្ពាន)សង្កាត់ស្ទឹងមានជ័យ២ ខណ្ឌមានជ័យ និងជនសង្ស័យទី២ ឈ្មោះ ចាន់ វាសនា ភេទប្រុស អាយុ ៣០ឆ្នាំ មុខរបរទាក់ឆ្កែ ស្នាក់នៅមិនពិតប្រាកដ ។ ដកហូតបាន ម៉ូតូ ១គ្រឿង ក្រហម ស្លាកលេខភ្នំពេញ 1AA- 6849 និងសត្វឆ្កែ១ក្បាលពណ៌ខ្មៅ ជាវត្ថុតាង ។

លោកអធិការង ខណ្ឌចំការមនបានឲ្យដឹងថា មុននឹងឈានដល់ការចាប់ឃាត់ខ្លួនបានជនសង្ស័យខាងលើ សមត្ថកិច្ចបានចុះល្បាតក្នុងភូមិសាស្ត្រ លុះដល់ចំណុចកើតហេតុ ក៏បានឃើញជនសង្ស័យ២នាក់ជិះ ម៉ូតូម៉ាក Suzuki Smash V ពណ៌ក្រហម មួយគ្រឿង ពាក់ស្លាកលេខ ភ្នំពេញ 1AA-6849 បានធ្វើសកម្មភាពទាក់ឆ្កែមួយក្បាល អូសតែត្រូវបានកម្លាំងល្បាតឃើញទាន់ ក៏ដេញតាមឃាត់បានខ្លួន នៅតាមបណ្ដោយផ្លូវ៤៣០ ក្រោយពេទ្យរុស្សី ហើយត្រូវបានបងប្អូនប្រជាពលរដ្ឋស្វាគមន៍ម្នាក់មួយដៃមួយជើងទ្រោមខ្លួនផងដែរ ។

ភ្លាមៗជនសង្ស័យខាងលើ ត្រូវបានសមត្ថកិច្ចនាំយកមកកាន់ប៉ុស្តិ៍ផ្សារដើមថ្កូវ ដើម្បីធ្វើការសាកសួរ និងបញ្ជូនខ្លួនទៅកាន់អធិការដ្ឋាននគរបាលខណ្ឌចំការមន ឃាត់ខ្លួនបណ្តោះអាសន្ន និងបញ្ជូនខ្លួនទៅកាន់តុលាការចាត់ការតាមច្បាប់បន្តទៀត ៕