រាជធានីភ្នំពេញ ៖ នារី២នាក់ បានរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ ខណៈជិះម៉ូតូម៉ាក Zoomer-X តាមដងផ្លូវ មកដល់ផ្លូវបំបែកជា៤ ក៏ត្រូវបានរថយន្តម៉ាកកាមរី ស៊េរីទំនើបមួយគ្រឿង ដែលបើកបរក្នុងល្បឿនលឿន មកបុកពេញទំហឹង កាលពីវេលាម៉ោង ១២និង២៥នាទី ថ្ងៃទី ១៦ ខែកក្កដា ឆ្នាំ ២០២១ នៅតាមបណ្ដោយផ្លូវលេខ២០៥ កែងផ្លូវលេខ៣៤៨ ក្នុងសង្កាត់ទួលស្វាយព្រៃ២ ខណ្ឌបឹងកេងកង រាជធានីភ្នំពេញ ។

តាមប្រភពព័ត៌មានពីកន្លែងកើហេតុបានឱ្យដឹងថា មុនកើតហេតុ គេឃើញរថយន្តម៉ាកកាមរីស៊េរីទំនើប ពណ៌ស ពាក់ស្លាកលេខ ភ្នំពេញ 2AL-2789 បើកបរដោយបុរសម្នាក់ តាមផ្លូវលេខ៣៤៨ ក្នុង ពីកើតទៅលិចក្នុងល្បឿនលឿន ដល់ផ្លូវបំបែកជាបួន ក៏បានបុកជាមួយនឹងម៉ូតូម៉ាក Zoomer-X ពណ៌ស ពាក់ស្លាកលេខ ភ្នំពេញ 1FZ-3159 ជិះដោយនារី២នាក់ តាមផ្លូវលេខ២០៥ ពីជើងទៅត្បូង ចំចំហៀងពេញទំហឹងខ្ទាតជិត១០ម៉ែត្រ រងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ។ ចំណែករថយន្តបានបាក់កាងមុខផ្នែកខាងឆ្វេង និងបែកបាក់កញ្ចក់ផងដែរ ។

ក្រោយកើតហេតុ សមត្ថកិច្ចនគរបាលចរាចរណ៍មូលដ្ឋាន បានចុះមកធ្វើការវាស់វែង យករថយន្ត និងម៉ូតូទៅរក្សាទុក នៅអធិការដ្ឋាននគរបាលខណ្ឌបឹងកេងកង ដើម្បីចាត់ការតាមច្បាប់បន្តទៀត ៕