រាជធានីភ្នំពេញ ៖ មានការភ្ញាក់ផ្អើលទាំងព្រឹក ខណៈបុរសម្នាក់ជិះម៉ូតូទៅធ្វើការ បានជ្រុលទៅបុកនឹងសត្វគោ មួយក្បាល ដែលរត់បោលចូលផ្លូវកំពុងជិះ បណ្តាលឲ្យដួល ត្រូវបានបញ្ជូនទៅសង្គ្រោះព្យាបាលនៅមន្ទីរពេទ្យ ។ ចំណែកសត្វគោវិញ បាក់ជើងម្ខាង ។

ហេតុការណ៍នេះបានកើតឡើងនៅម៉ោង ៧និង២០នាទីព្រឹក ថ្ងៃទី១៦ ខែកក្កដា ឆ្នាំ២០២១ តាមបណ្ដោយផ្លូវ៥០ម៉ែត្រ ភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ ។

តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញបុរសម្នាក់ បានជិះម៉ូតូមួយគ្រឿងម៉ាកហុងដាសេ១៥ ពណ៌ខ្មៅ ពាក់ស្លាកលេខ ភ្នំពេញ 1HC-9525 ធ្វើដំណើរតាមបណ្តោយផ្លូវ ៥០ម៉ែត្រ ក្នុងបំណងទៅធ្វើការ លុះដល់ចំណុចកើតហេតុ ស្រាប់តែមានសត្វគោមួយក្បាល បានបោលមកបុក ជាមួយនឹងម៉ូតូរបស់គាត់ បណ្តាលឲ្យដួលរងរបួសត្រូវបានបញ្ជូនទៅសង្គ្រោះព្យាបាលនៅមន្ទីរពេទ្យ ។ ចំណែកសត្វគោឯណោះវិញ ក៏រងរបួសបាក់ភ្លៅម្ខាងផងដែរ ។

ក្រោយកើតហេតុ សមត្ថកិច្ចនគរបាលចរាចរណ៍មូលដ្ឋាន បានចុះមកធ្វើការវាស់វែង និងសម្របសម្រួលឲ្យម្ចាស់គោ សងសំណងទៅឲ្យជនរងគ្រោះដើម្បីបញ្ចប់រឿងនៅនឹងកន្លែងកើតហេតុតែម្តង ៕ មេសា