បាត់ដំបង៖ ជនសង្ស័យចំនួន២នាក់ ធ្វើសកម្មភាពយកដំបងដែក វាយទៅលើភាគីម្ខាងទៀត ដើម្បីស្រាយគំនុំចាស់ ត្រូវបាននគរបាលខេត្តបាត់ដំបង ចាប់ឃាត់ខ្លួន កាលពីវេលាម៉ោង២ និង៣០នាទី ថ្ងៃទី១៦ ខែមីនា ឆ្នាំ២០២១ ក្នុងភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង។
សមត្ថកិច្ចបញ្ជាក់ថា ជនសង្ស័យទាំង ២នាក់រួមមាន៖
១-ឈ្មោះ ព្រំ សុជាតិ ភេទប្រុស អាយុ ២១ឆ្នាំ មានទីលំនៅភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង។
២-ឈ្មោះ ខា សីហា ហៅ ទិត្យ ភេទប្រុស អាយុ ១៩ឆ្នាំ មានទីលំនៅភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង។
ប្រភពដដែលបញ្ជាក់ទៀតថា កាលពីថ្ងៃទី១៤ ខែមីនា ឆ្នាំ២០២១ ជនសង្ស័យទាំង ២នាក់ ខាងលើ បានយកដំបងដែក និងខ្សែក្រវ៉ាត់ក្បាលដែក វាយទៅលើជនរងគ្រោះ ឈ្មោះ សយ វិស័យ ភេទប្រុស អាយុ ១៩ឆ្នាំ បណ្តាលឲ្យរងរបួស ត្រង់ក្បាលផ្នែកខាងស្តាំដេរចំនួន ៣ថ្នេរ ត្រង់ក្បាលខាងឆ្វេងដេរចំនួន ៤ថ្នេរ រយះចុងចិញ្ចើមស្តាំដេរចំនួន ៤ថ្នេរ និងហើមប៉ោងភ្នែកខាងស្តាំ នៅចំណុចមុខភោជនីយដ្ឋានសាច់អាំងផ្សារលើ២ ដែលស្ថិតនៅក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដោយសារមានគំនុំជាមួយជនរងគ្រោះក្នុងរយ:ពេលកន្លងមក។
ក្រោយកើតហេតុជនរងគ្រោះបានដាក់ពាក្យបណ្តឹងចូលមកសមត្ថកិច្ចនគរបាល ហើយឆ្លងតាមរយ:ការស្រាវជ្រាវបាន២ថ្ងៃកន្លង មក ទើបសមត្ថកិច្ចធ្វើការឃាត់ខ្លួនបានតែម្តង ដើម្បីបញ្ជូនទៅសាលាដំបូងខេត្តបាត់ដំបង ចាត់ការបន្តតាមច្បាប់៕
