រាជធានីភ្នំពេញ ៖ រថយន្តមួយគ្រឿងបានរេចង្កូតឡើងលើសួនច្បារចែកទ្រូងផ្លូវ បណ្តាលឲ្យរងការខូចខាត ហើយព្យាយាមបើករត់ ត្រូវបានសមត្ថកិច្ចដេញតាមឃាត់បានមកវិញ ក្រោយរថយន្តនេះបួងចង្កូតគេចពីម៉ូតូមួយគ្រឿងដែលបើកវ៉ាជែង ។

ករណីនេះបានកើតឡើងកាលពីវេលាម៉ោង ១២និង៣០នាទីថ្ងៃត្រង់ថ្ងៃទី១៧ ខែកក្កដា ឆ្នាំ២០២១ នៅតាមបណ្តោយផ្លូវជាតិលេខ៦អា សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។

តាមប្រភពព័ត៌មានពីសមត្ថកិច្ចចរាចរណ៍ ដែលប្រចាំការនៅគោលដៅស្តុបលីយ៉ុងផាត់ បានប្រាប់ឲ្យដឹងថា មុនពេលកើតហេតុ គេបានឃើញរថយន្តដឹកដី មួយគ្រឿង ពណ៌ស គ្មានស្លាកលេខ បានធ្វើដំណើរចេញពីផ្លូវឧកញ៉ា លី យ៉ុងផាត់ ខណៈពេលមកដល់ចំណុចកើតហេតុក៏មានម៉ូតូមួយគ្រឿងទៀត បានជិះមកវ៉ា ហើយរថយន្តក៏បានបើកគេច រួចជ្រុលឡើងលើសួរច្បារពុះចែកទ្រូងផ្លូវតែម្តង ភ្លាមៗរថយន្តនេះមិនបានឈប់នោះទេ បានបើករថយន្តរត់គេចចេញកន្លែងកើតហេតុ ហើយភ្លាមៗត្រូវបានកម្លាំងសមត្ថកិច្ចបានដេញតាមពីក្រោយ រហូតដល់ខាងក្រោយសាលាបឋមសិក្សាចំបក់មាស ទើបឃាត់រថយន្តដឹកដីខាងលើនេះបានតែម្តង ។

ក្រោយកើតហេតុសមត្ថកិច្ចបានធ្វើការវាស់វែង យករថយន្តខាងលើ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាពេលក្រោយតាមច្បាប់បន្តទៀត ៕