រាជធានីភ្នំពេញ ៖ បុរស២នាក់ បានស្លាប់យ៉ាងរន្ធត់ភ្លាមៗ ក្នុងករណីគ្រោះថ្នាក់ចរាចរណ៍ រវាងម៉ូតូនិងរថយន្ត បុកគ្នាពេញទំហឹង កាលពីវេលាម៉ោង ៩ ថ្ងៃទី១៨ ខែកក្កដា ឆ្នាំ២០២១ នៅតាមបណ្តោយផ្លួវ១០០៣ ក្នុងសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។

បើប្រភពព័ត៌មានពីបងប្អូនប្រជាពលរដ្ឋ នៅកន្លែងកើតហេតុ បានឲ្យដឹងថា គេបានឃើញរថយន្តព្រុសមួយគ្រឿង ពាក់ស្លាកលេខ ភ្នំពេញ 2AQ-5611 បើកបរក្នុងល្បឿនលឿនពីជើងទៅត្បូង តាមបណ្ដោយផ្លូវបេតុង ដែលហៅថាផ្លូវ ១០០៣ ដល់ចំណុចកើតហេតុ ក៏បានបុកគ្នាជាមួយនឹងម៉ូតូស៊ុយសាគីនិច ដែលពាក់ស្លាកលេខ ភ្នំពេញ 1AF-2197 ឌុបគ្នា២នាក់ ពេញទំហឹងបណ្ដាលឲ្យបុរសទាំង ២ នាក់ ហោះដូចសំឡី ស្លាប់ភ្លាមៗមួយរំពេច។

ប្រភពដដែលបានបន្តថា ភ្លាមនោះរថយន្តខាងលើមិនទាន់អស់ល្បឿន ក៏បានបន្តជ្រុលបើកធ្លាក់ចូលទៅក្នុងរណ្ដៅដីមួយកន្លែង គឿងជាប់ទៅមុខលែងរួច ។ ចំណែកអ្នកបើកបររថយន្តនោះ បានបើកទ្វាររត់គេចខ្លួនបាត់ស្រមោល ។

ក្រោយពេលកើតហេតុ សមត្ថកិច្ចនគរបាលចរាចរណ៍មូលដ្ឋាន សហការជាមួយនគរបាលចរាចរណ៍ក្រុង បានចុះមកធ្វើការវាស់វែង យករថយន្តនិងម៉ូតូទៅរក្សាទុកនៅ ការិយាល័យជំនាញចរាចរណ៍ផ្លូវគោករបស់ស្នងការនគរបាលរាជធានីភ្នំពេញ ដើម្បីរង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិ ធ្វើបុណ្យតាមប្រពៃណី ៕