រាជធានីភ្នំពេញ ៖ រថយន្តមួយគ្រឿង បើកបរខ្វះការប្រុងប្រយត្ន័ បានបុកថ្មពុះចែកទ្រូងផ្លូវ២៧១ បណ្ដាលឲ្យរងការខូចខាតយ៉ាងដំណំ កាលពីវេលាម៉ោង ១ រំលងអធ្រាត្រ ឈានចូលថ្ងៃទី២០ ខែកក្កដា ឆ្នាំ២០២១ នៅតាមបណ្ដោយផ្លូវ២៧១ សង្កាត់ទួលទំពួង២ ខណ្ឌចំការមន រាជធានីភ្នំពេញ។

តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុ មានបុរសម្នាក់ដែលបានបើករថយន្តម៉ាកវីហ្គោ មួយគ្រឿង ដែលពាក់ស្លាកលេខ ភ្នំពេញ 2AH-7646 បើកតាមបណ្ដោយផ្លូវ ២៧១ ក្នុងទិសដៅពីកើតមកលិច មកដល់ត្រង់ចំណុចកើតហេតុក៏បានរេចង្កូតទៅបុករបាំងថ្មពុះចែកទ្រូងផ្លូវបណ្ដាលឲ្យរថយន្តរងការខូចខាតមួយកំណាត់ខាងមុខ ភ្លាមនោះម្ចាស់រថយន្តក៏បានបើកទ្វាររត់គេចចេញពីកន្លែងកើតហេតុ។

ក្រោយពេលកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌចំការមន បានមកដល់ធ្វើការទំនាក់ទំនងហៅសមត្ថកិច្ចជំនាញ ចរាចរណ៍របស់ការិយាល័យស្នងការដ្ឋាននគរបាលរាជធានីភ្នំពេញ ធ្វើការស្ទូចរថយន្តខាងលើយកទៅរក្សាទុកនៅស្នងការចរាចរណ៍ផ្លូវគោក រង់ចាំម្ចាស់ចូលមកដោះស្រាយគ្នាទៅតាមច្បាប់ ៕