ក្រុងព្រះសីហនុ ៖ គ្រោះថ្នាក់ចរាចរណ៍មួយបានបង្កឡើង រវាងម៉ូតូជាមួយនឹងម៉ូតូកង់បីមួយគ្រឿងទៀត បណ្ដាលឲ្យមនុស្សម្នាក់រងរបួសស្រាល បង្កការភ្ញាក់ផ្អើលនៅម៉ោង ៧និង១៥នាទីយប់ថ្ងៃទី ១៩ ខែ កក្កដា ឆ្នាំ២០២១ លើផ្លូវ៧មករា កែងបត់ចូលម្លប់តាប៉ាង ក្នុងសង្កាត់លេខ ០៤ ក្រុងព្រះសីហនុ ខេត្តព្រះសីហនុ។

តាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញម៉ូតូកង់បីពាក់ស្លាកលេខ កំពង់ចាម 1W-3155 បើកចេញពីផ្លូវកែង ទិសដៅពីម្លប់តាប៉ាងឆ្ពោះទៅកាន់រង្វង់មូលតោពីរ លុះមកដល់កន្លែងកើតហេតុ ក៏មានម៉ូតូមួយគ្រឿងទៀត ម៉ាកឌ្រីមសង់ ស៊េរីឆ្នាំ២០១៧ ពាក់ស្លាកលេខ ព្រះសីហនុ 1F-2957 បើកបរក្នុងទិសដៅតោពីរ សំដៅទៅផ្លូវអិលវីចាស់ ដោយម៉ូតូបានឡើងវ៉ាខ្វះការប្រុងប្រយ័ត្ន ត្រូវបានទៅបុកជាមួយនឹងម៉ូតូកង់បីមួយទំហឹង បណ្ដាលឲ្យភាគីខាងម៉ូតូរងការខូចខាតយ៉ាងដំណំផ្នែកខាងមុខ។ ចំណែកឯភាគីថាម៉ូតូរងរបួសស្រាល ។

ក្រោយពេលកើតហេតុសមត្ថកិច្ចនគរបាលចរាចរណ៍ផ្លូវគោក បានធ្វើការវាស់វែង យកវត្ថុតាងទាំងសងខាង ទៅរក្សាទុកនៅការិយាល័យចរាចរណ៍ដើម្បីធ្វើការដោះស្រាយតាមនីតិវិធីផ្លូវច្បាប់ ៕