រាជធានីភ្នំពេញ ៖ មានការភ្ញាក់ផ្អើលទាំងយប់ ខណៈសមត្ថកិច្ចនៃអធិការដ្ឋាននគរបាលខណ្ឌចំការមន បានធ្វើការដេញតាមចាប់ក្រុមចោរទាក់ឆ្កែពេលរាត្រី យ៉ាងប្រផាប់ប្រភីង រហូតក្រុមចោរទាំងនោះភ័យខ្លាំង ផ្តួលម៉ូតូចោល រត់ចូលទន្លេបាត់ សល់តែម៉ូតូ និងសត្វឆ្កែមួយការ៉ុង ដែលក្នុង១ការ៉ុងនោះ មានឆ្កែរហូតដល់៦ក្បាលឯណោះ ដែលក្រុមចោរទាំងនោះ ទាក់បាន ។

ហេតុការណ៍នេះបានកើតឡើងកាលពីវេលាម៉ោង ២ និង៣០នាទី រំលងធ្រាត្រ ឈានចូលថ្ងៃទី២០ ខែកក្កដា ឆ្នាំ២០២១ ដោយសមត្ថកិច្ចបានដេញតាម តាំងពីភូមិសាស្ត្រខណ្ឌចំការមន រហូតរត់មកដល់ផ្លូវជាតិលេខ៥ ក្នុងភូមិសាមគ្គី សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ។

សមត្ថកិច្ចបានឲ្យដឹងថា មុនពេលកើតហេតុ កម្លាំងអធិការដ្ឋាននគរបាលខណ្ឌចំការមន បានល្បាតក្នុងភូមិសាស្ត្រ ពេលនោះក៏ប្រទះឃើញជនសង្ស័យ២នាក់ ជិះម៉ូតូម៉ាកហុងដាវ៉េវ ពណ៌ខ្មៅ ពាក់ស្លាកលេខ កំពង់ចាម 1J-3431 ដឹកសត្វឆ្កែពេញមួយការ៉ុងតែម្តងហើយកំពុងធ្វើសកម្មភាពទាក់ឆ្កែមួយក្បាលទៀតនៅម្តុំផ្លូវបែកជា៥ ត្រូវបានសមត្ថកិច្ចដេញតាមចាប់ រហូតជនសង្ស័យទាំងនេះ ភ័យជិះរត់តាំងពីភូមិសាស្ត្រខណ្ឌចំការមន ដូចហោះ រហូតមកដល់ ផ្លូវជាតិលេខ៥ ក្នុងភូមិសាមគ្គី សង្កាត់ឬស្សីកែវ ខណ្ឌឬស្សីកែវ ក៏ផ្តួលម៉ូតូចោល ហើយរត់ចូលទន្លេគេចខ្លួនបាត់តែម្តង សល់តែសត្វឆ្កែមួយការ៉ុង ដែលក្នុង១ការ៉ុងនោះ មានឆ្កែរហូតដល់៦ក្បាលឯណោះ ដែលក្រុមចោរទាំងនោះ ទាក់បាន ។

បច្ចុប្បន្នវត្ថុតាងទាំងនេះ ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីស្រាវជ្រាវតាមចាប់ក្រុមចោរទាំងនេះ យកមកផ្តន្ទាទោសតាមច្បាប់បន្តទៀត៕