រាជធានីភ្នំពេញ ៖ ឆ្លងចរន្តអគ្គិសនីឆាបឆេះ អាសនៈ នឹងពូកក្នុងបន្ទប់ផ្ទះល្វែង នៅជាន់ឡៅតឿ បង្កឲ្យមានការភ្ញាក់ផ្អើលយ៉ាងខ្លាំងទៅដល់រថយន្តពន្លត់អគ្គិភ័យក៏ដូចជាកម្លាំងសមត្ថកិច្ចនគរបាលខណ្ឌដង្កោ បានចុះមកជួយអន្តរាគមន៍ភ្លាមៗ កាលពីវេលាម៉ោង៥ល្ងាច ថ្ងៃទី២០ ខែកក្កដា ឆ្នាំ២០២១ នៅចំណុចផ្ទះលេខ១០២ ផ្លូវបេតុងលេខ០៩ បុរីភពថ្មី សង្កាត់ដង្កោ ខណ្ឌដង្កោ រាជធានីភ្នំពេញ។

តាមប្រភពព័ត៌មានពីម្ចាស់ផ្ទះជួលបានឲ្យដឹងថាមុនពេលកើតហេតុ ផ្ទះដែលគាត់ជួលសព្វថ្ងៃគឺតែងតែលោតឌីសង់ទ័រញឹកញាប់ គាត់ក៏បានប្រាប់ទៅម្ចាស់ផ្ទះរួចហើយដែរ តែម្ចាស់ផ្ទះបានប្រាប់គាត់ថាប្រើសិនទៅ លុះដល់ម៉ោងកើតហេតុ ស្រាប់តែឆ្លងចរន្តអគ្គីសនី ធ្លាក់ផ្កាភ្លើងលើអាសនៈ ឆាបឆេះរាលដាលដល់ពូកបង្កឲ្យមានការភ្ញាក់ផ្អើលដល់បងប្អូនអ្នកជិតខាងនាំគ្នាយកបំពង់ពន្លត់អគ្គីភ័យនឹងទុយោទឹកជួយបាញ់ការពារមិនអោយរាលដាលនឹងប្រញាប់រាយការជូនដល់កម្លាំងសមត្ថកិច្ចនឹងរថយន្តពន្លត់អគ្គីភ័យអោយចេញជួយអន្តរាគមន៍។

ក្រោយមករថយន្តពន្លត់អគ្គីភ័យចេញជួយអន្តរាគមន៍ចំនួន៣គ្រឿងធ្វើការបាញ់ពន្លត់អស់២គ្រឿងអោយរលត់ទៅវិញជាស្ថាពរ មិនបណ្តាលឲ្យមានអ្នករបួសនោះទេ គ្រាន់តែខូចខាតសម្ភារៈមួយចំនួនប៉ុណ្ណោះ ៕ មេសា