រាជធានីភ្នំពេញ ៖ ជនសង្ស័យម្នាក់ ធ្វើសកម្មភាពលួចម៉ូតូដឹកត្រី ពីផ្សារព្រែព្នៅ ម្ចាស់គេទាន់ ជិះតាមស្រែកថាចោរៗ ត្រូវបានសមត្ថកិច្ចខណ្ឌមានជ័យ ដេញតាមរហូតមកដល់ផ្លូវវេងស្រេង ទើបឃាត់បាន កាលពីវេលាម៉ោង ១០យប់ ថ្ងៃទី២០ ខែកក្កដា ឆ្នាំ២០២១ នៅតាមបណ្ដោយផ្លូវវេងស្រេង ក្នុងសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីជនរងគ្រោះបានឲ្យដឹងថា មុនពេលកើតហេតុ ឪពុកគាត់ទុកម៉ូតូដឹកត្រីម៉ាកហុងដាឌ្រីមសេ១២៥ ពាក់ស្លាកលេខ ភ្នំពេញ 1K-3477 នៅមុខផ្ទះស្រាប់តែលេចមុខជនសង្ស័យ បានធ្វើសកម្មភាពលួចចេញពីផ្ទះរបស់គាត់ ហើយគាត់បានជិះតាមរករហូតមកដល់ផ្សារព្រែកព្នៅ ក៏ឃើញម៉ូតូដែលជនសង្ស័យកំពុងជិះ ទើបស្រែកឆោឡោចោរៗ ដេញតាមពីក្រោយ មកដល់ផ្លូវវេងស្រេង ក៏មានកម្លាំងអន្តរាគមន៍អធិការនគរបាលខណ្ឌមានជ័យ កំពុងល្បាត ប្រដេញតាមចាប់ខ្លួនបានភ្លាមៗតែម្តង នៅផ្លូវវេងស្រេង ក្នុងសង្កាត់ចោមចៅ១ ខណ្ឌពោធិ៍សែនជ័យ។

បច្ចុប្បន្នជនសង្ស័យខាងលើ រួមទាំងវត្ថុតាង ត្រូវបានសមត្ថកិច្ចខណ្ឌមានជ័យ ប្រគល់ឲ្យទៅសមត្ថកិច្ចខណ្ឌព្រែកព្នៅវិញ ដែលជាម្ចាស់ករណី ដើម្បីចាត់ការបន្តតាមនីតិវិធីច្បាប់ ៕