ខេត្ត ព្រះសីហនុ ៖ ប្រជាពលរដ្ឋមានការភ្ញាក់ផ្អើល ខណៈទូកដឹកបន្លែ គ្រឿង បានផ្ទុះឆេះហើយលិចចូលទឹកសមុទ្រតែម្តង បណ្តាលឲ្យស្លាប់ម្នាក់យ៉ាងរន្ធត់ និង៦នាក់ទៀត រងរបួសធ្ងន់ស្រាល កាលពីវេលាម៉ោង ១០ និង២០នាទីព្រឹក ថ្ងៃទី២១ ខែកក្តដា ឆ្នាំ២០២១ នៅចំណុចចន្លោះពីផែសហគមន៍ភូមិដើមថ្កូវ សង្កាត់កោះរ៉ុង ក្រុងកោះរ៉ុង ទៅផែ៥២ សង្កាត់១ ក្រុងព្រះសីហនុ ខេត្តព្រះសីហនុ។

សមត្ថកិច្ចបានឲ្យដឹងថាទូកដឹកបន្លែ ដែលត្រូវបានភ្លើងឆេះនេះ មានទំហំទទឹង ៣,៤ម៉ែត្រ បណ្តោយ ១៣ម៉ែត្រ ម៉ាស៊ីន ១៣០ សេស ពណ៌ប្រផេះ ម្ចាស់ឈ្មោះ រត្ន័ ឧត្តម ភេទប្រុស អាយុ២៦ ឆ្នាំ ទីលំនៅបច្ចុប្ប ន្នភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ ។

តាមការបំភ្លឺរបស់តៃកុងទូក ៖ នៅលើទូកមានដឹកមនុស្សចំនួន ១១ នាក់ ក្នុងនោះមានស្រី ០៥ នាក់ បានចេញដំណើពីផែសហគមន៍ភូមិដើមថ្កូវ សង្កាត់កោះរ៉ុង ក្រុងកោះរ៉ុងទៅផែ៥២ សង្កាត់១ ក្រុងព្រះសីហនុ ខេត្តព្រះសីហនុ លុះដល់កន្លែងកើតហេតុ ម៉ាស៊ីនបានធ្លាយទុយោប្រេង ប៉ះនឹងបំពង់ស៊ីម៊ាំងម៉ាស៊ីនទូកបណ្តាលអោយឆាបឆេះ រួចលិចទូកចូលសមុទ្រតែម្តង ។

សមត្ថកិច្ចបានឲ្យដឹងផងដែរថា ក្នុងរង្វង់ករណីអគ្គិភ័យនេះ ក៏បានបណ្តាលឲ្យស្ត្រីម្នាក់ ឈ្មោះ ហ៊ីង ស្រស់ ភេទ ស្រី អាយុ ៥០ ឆ្នាំ រស់នៅភូមិដើមថ្កូវ សង្កាត់កោះរ៉ុង ក្រុងកោះរ៉ុង បានស្លាប់ ខណៈមនុស្ស៦នាក់ទៀតរងបួសរងរបួសធ្ងន់ស្រាល ៕ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ