កំពង់ស្ពឺ​៖ ពិតជារន្ធត់ណាស់ ខណៈបុរសម្នាក់កំពុងជិះម៉ូតូតាមដងផ្លូវ ស្រាប់តែត្រូវបានរថយន្តធុនធំ សណ្តោងកន្ទុយរ៉ឺម៉ក បុកពេញទំហឹងផ្លោងទាំងរថយន្តនិងម៉ូតូរុញធ្លាក់ពីលើផ្លូវ ស្លាប់យ៉ាងរន្ធត់ភ្លាមៗ កាលពីវេលាម៉ោង៤ល្ងាច ថ្ងៃទី១៧ ខែមីនា ឆ្នាំ២០២១ លើផ្លូវក្រាលកៅស៊ូ ភូមិអង្គក្ដី ឃុំទួលអំពិល ស្រុកបសេដ្ឋ ខេត្តកំពង់ស្ពឺ ។

តាមរបាយការណ៍សមត្ថកិច្ចបានបញ្ជាក់ថា ករណីនេះ កើតឡើងរវាង ម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០០២ ពាក់ស្លាកលេខ កំពង់ចាម 1B-2003 ជិះដោយបុរសម្នាក់ឈ្មោះ ផ្លុង ក្ដឹប ភេទប្រុស អាយុ៤៨ឆ្នាំ រស់នៅភូមិអង្គក្ដី ឃុំទួលអំពិល ស្រុកបសេដ្ឋ ខេត្តកំពង់ស្ពឺ ពីកើតមកលិច ។

ប្រភពដដែលបន្តថា លុះដល់ចំណុចកើតហេតុ ស្រាប់តែមានរថយន្ត១គ្រឿងម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ព្រះសីហនុ 3A-7858 សណ្ដោងរម៉ក ពណ៌ស្វាយ ពាក់ស្លាកលេខ ព្រះសីហនុ 4A-3095 ដែលំពុងបើកបរបញ្រ្ចាសទិសគ្នា មកបុកយ៉ាងពេញទំហឹង បណ្ដាលឲ្យអ្នកបើកបរម៉ូតូស្លាប់នៅនឹងកន្លែងកើត ។

ក្រោយកើតហេតុ សមត្ថកិច្ចនគរបាលមូលដ្ឋាន សហការជាមួយជំនាញចរាចរណ៍ វាស់វែង យកវត្ថុតាងទៅរក្សាទុកនៅ អធិការដ្ឋាននគរបាលស្រុកបសេដ្ឋ រង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕