រាជធានីភ្នំពេញ ៖ អគ្គិភ័យមួយបានឆាបឆេះផ្ទះល្វែងមួយកន្លែង ក្នុងបុរីពិភពថ្មីឡាឡែនសែនសុខ២ ឆេះខូចខាតសម្ភារៈជាន់ទី១យ៉ាងសន្ធោសន្ធៅ កាលពីវេលាម៉ោង៥និង៥០នាទី ល្ងាចថ្ងៃទី២១ ខែកក្កដា ឆ្នាំ២០២១ នៅចំណុចផ្ទះលេខ៤២ ផ្លូវ៦A បុរីពិភពថ្មីឡាលែនសែនសុខ២ ក្នុងភូមិក្រាំងអង្ក្រង សង្កាត់ក្រងធ្នង់ ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថា ម្ចាស់ផ្ទះដែលត្រូវអគ្គិភ័យឆាបឆេះនេះ មានឈ្មោះ ទេព វ៉ាន់ណារ៉ូ ភេទប្រុស អាយុ៣០ឆ្នាំ និងប្រពន្ធឈ្មោះ ឈឿន វណ្ណា អាយុ២៧ឆ្នាំ មុខរបរលក់ឡេតាមអនឡាញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ មានប្អូនប្រុសម្ចាស់ផ្ទះម្នាក់ អាយុ១២ឆ្នាំនៅក្នុងផ្ទះ ខណៈនោះ ស្រាប់តែទុស្សេនៅជាន់ទី១ ឆាបឆេះ ទើបប្អូនរបស់ម្ចាស់ផ្ទះបានរត់ចេញមកខាងក្រៅ ស្រែកឲ្យអ្នកជិតខាងជួយតែម្តង។

ប្រភពព័ត៌ដដែលបន្តថា ភ្លាមនោះ គេឃើញសន្តិសុខក្នុងបុរីខាងលើ បានយកបំពង់ពន្លត់អគ្គិភ័យមកបាញ់ពន្លត់ដែរ តែមិនរលត់នោះទេ។

ក្នុងរង្វង់ប្រតិបត្តិការនេះ សមត្ថកិច្ចបានឲ្យដឹងផងដែរថា មានរថយន្តពន្លត់អគ្គិភ័យចំនួន៣គ្រឿង បានចុះមកបាញ់ពន្លត់ ខណៈដែលការឆាបឆេះនេះ គឺបណ្តាលមកពីទុស្សេខ្សែភ្លើងរាលដល់កន្លែងដាក់កេសឡេ ហើយម្ចាស់ផ្ទះទើបចូលនៅបាន១ខែប៉ុណ្ណោះ ចាត់ទុកថាសំណាងគ្មាននរណាម្នាក់ រងរបួសនោះឡើយ ៕