រាជធានីភ្នំពេញ ៖ រន្ធត់ណាស់! បុរសម្នាក់បានស្លាប់ភ្លាមៗយ៉ាងរន្ធត់ ខណៈកំពុងជិះកង់តាមដងផ្លូវ ស្រាប់តែត្រូវរថយន្តមិនចាំម៉ាក បើកលឿនដូចហោះ បុកប៉ើងជាច្រើនម៉ែត្រដូចសំឡី ស្លាប់មួយរំពេច ហើយបើកគេចខ្លួនបាត់ស្រមោល បង្កការភ្ញាក់ផ្អើលនៅម៉ោង ១ និង២០នាទីយប់ ឈានចូលថ្ងៃទី២២ ខែកក្កដា ឆ្នាំ២០២១ តាមបណ្តោយផ្លូវជាតិលេខ១ ក្នុងសង្កាត់និរោធ ខណ្ឌច្បាអំពៅ រាជធានីភ្នំពេញ។

សមត្ថកិច្ចបានឲ្យដឹងថា សពជនរងគ្រោះដែលស្លាប់ មិនទាន់ស្គាល់អត្តសញ្ញាណនោះទេ មានរាងស្គម សម្បុរខ្មៅ ស្លៀកខោជើងវែងខ្មៅ អាវពណ៌ក្រហម។

ក្នុងនោះ តាមប្រភពព័ត៌មានពីពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ ជិះកង់មួយគ្រឿង ពីកើតទៅលិច លុះដល់ចំណុចកើតហេតុ ក៏មានរថយន្តមួយគ្រឿងមិនចាំម៉ាក បានបើកក្នុងល្បឿនលឿន មកបុកពីក្រោយជនរងគ្រោះកំពុងជិះកង់ ហោះប៉ើងជាច្រើនម៉ែត្រដូចសំឡី ស្លាប់ភ្លាមៗយ៉ាងរន្ធត់។ រួចហើយរថយន្តនោះ ក៏បន្តល្បឿនបើកគេចខ្លួនបាត់ស្រមោល។

ក្រោយពេលកើតហេតុ សមត្ថកិច្ចចរាចរណ៍មូលដ្ឋាន សហការជាមួយនគរបាលចរាចរណ៍ក្រុង ចុះធ្វើការវាស់វែងយកបំណែកកង់ជនរងគ្រោះទៅរក្សាទុក និងហៅរថយន្តសាមុយ មកដឹកសពជនរងគ្រោះទៅតម្កល់ទុកនៅវត្ត ដើម្បីស្រាវជ្រាវរកសាច់ញាតិ មកទទួលធ្វើបុណ្យតាមប្រពៃណី និងស្រាវជ្រាវរករថយន្តបង្ក បន្តទៀត ដើម្បីមកដោះស្រាយគ្នាតាមច្បាប់ ៕