ខេត្តសៀមរាប ៖ ករណីគ្រោះថ្នាក់ ចរាចរណ៍រវាងរថយន្តនិងរថយន្ត បានបុកគ្នាពេញទំហឹង រហូតផ្ទុះឆេះយ៉ាងសន្ធោសន្ធៅ បង្កការភ្ញាក់ផ្អើល កាលពីវេលាម៉ោង១២ និង៥០នាទីយប់ឈានចូលថ្ងៃទី២២ ខែកក្កដា ឆ្នាំ២០២១ នៅ ក្បែរ ស្ថានីយ ថ្លឹង រថយន្ត ចំងាយ ២៥០ម៉ែត្រ ក្នុង ភូមិ ពួក ស្រុក ពួក ខេត្ត សៀមរាប ។

សមត្ថកិច្ចបានឲ្យដឹងថា ករណីនេះ បង្កទៅជា អគ្គិភ័យ ដោយរថយន្តម៉ាក TRAILER ពាក់ស្លាកលេខ ភ.ព 4A.8127 ពណ៌ខៀវលាយស បើកពីកើតទៅលិច បានបុកជាមួយសត្វក្របីឆ្លងផ្លូវមួយក្បាល បណ្ដាលឲ្យរថយន្តរេចង្កូតទៅបុករថយន្តមួយទៀត ម៉ាកហ៊ីយ៉ាន់ដាយ ពាក់ស្លាកលេ កំពង់ចាម 3B.0773 ពណ៌ខៀវ ដែលបើកបញ្ច្រាស់ទិសគ្នា។

ក្នុងហេតុការណ៍នេះ ក៏បានបណ្តាលឲ្យមនុស្សចំនួន ០២ នាក់ រងរបួសធ្ងន់ស្រាល ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកពួក ។ ចំណែករថយន្តវិញ បានរងការខូចខាតយ៉ាងដំណំ ឆេះទាំង២គ្រឿង ដោយសមត្ថកិច្ចបានប្រើប្រាស់រថយន្តពន្លត់អគ្គីភ័យស្រុកពួក ចំនួន ០១ គ្រឿង ប្រើ ប្រាស់ ទឹកអស់ ០២ រថយន្ត និងរថយន្តពន្លត់អគ្គីភ័យរបស់ស្នងការដ្ឋានខេត្ត សៀមរាប ចំនួន ០១ រថយន្ត ប្រើប្រាស់ទឹកអស់ ចំនួន ០១ រថយន្ត ទើបរលត់ទៅវិញជាស្ថាពរ ៕ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ