ខេត្តព្រះសីហនុ៖ រថភ្លើង បើកបុកបុរសម្នាក់ពេញទំហឹង បណ្តាលឲ្យរងរបួសធ្ងន់ ខណៈបុរសរូបនោះ បានដើរលើផ្លូវរថភ្លើងមិនប្រយ័ត្នដោយខ្លួនឯង បង្ការភ្ញាក់ផ្អើលនៅម៉ោង៩ព្រឹក ថ្ងៃទី២២ ខែកក្កដា ឆ្នាំ២០២១ នៅចំណុចក្បែរស្ថានីយ៍រណបរថភ្លើងវាលរេញ ក្នុងភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ។

សមត្ថកិច្ចបានឲ្យដឹងថា បុរសដែលរងរបួសនេះមានឈ្មោះ ឡុក គ (ជាមនុស្ស គ ថ្លង់) អាយុ៣០ឆ្នាំ មានទីលំនៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ បានរងរបួសធ្ងន់ធ្ងរ ពេលដែលបុរសរូបនេះដើរលើផ្លូវរថភ្លើង ហើយត្រូវរថភ្លើងបុកពីក្រោយ។

បន្ទាប់ពីកើតហេតុ រថភ្លើងក៏បានបន្តដំណើរទៅមុខ។ ចំណែកជនរងគ្រោះត្រូវបានសមត្ថកិច្ចនាំយកទៅជួយសង្គ្រោះនៅពេទ្យឯកជនវាលរេញ ស្រុកព្រៃនប់ ៕