ខេត្តកំពង់ធំ ៖ គួរឲ្យសោកស្តាយ!មន្រ្តីកងរាជអាវុធហត្ថស្រុកតាំងគោកម្នាក់ កំពុងចុះបំពេញការងារអនុវត្តច្បាប់ជាមួយមន្រ្តីពន្ធដារ ត្រូវរថយន្តបុកស្លាប់

ខេត្តកំពង់ធំ ៖ គួរឲ្យសោកស្តាយចំពោះមន្រ្តីកងរាជអាវុធហត្ថស្រុកតាំងគោក ខេត្តកំពង់ធំ ដែលកំពុងចុះបំពេញការងារអនុវត្តច្បាប់ជាមួយមន្រ្តីពន្ធដារ ក៏ត្រូវរថយន្ត១គ្រឿងបើកបុកពេញមួយទំហឹងបណ្តាលឲ្យស្លាប់ បន្ទាប់ពីបានបញ្ជូនទៅព្យាបាលនៅមន្ទីរពេទ្យបង្អែកបារាយណ៍កាលពីរសៀលថ្ងៃទី១៧ ខែមីនា ឆ្នាំ២០២១ នៅតាមផ្លូវជាតិលេខ៦ ចន្លោះគីឡូម៉ែត្រលេខ ៩៨-៩៩ ចំណុចភូមិថ្លា ឃុំច្រនាង ស្រុកតាំងគោក ខេត្តកំពង់ធំ ។

សមត្ថកិច្ចបានអោយដឹងថា មន្រ្តីកងរាជអាវុធហត្ថ ដែលរងគ្រោះ មានឈ្មោះ សាន់ ថា ភេទប្រុស អាយុ៤៥ឆ្នាំ រស់នៅភូមិថ្នល់ជាតិ ឃុំបារាយណ៍ ស្រុកបារាយណ៍ ខេត្តកំពង់ធំ ជាជំនួយការមូលដ្ឋានកងរាជអាវុធហត្ថស្រុកតាំងគោក ខេត្តកំពង់ធំ។

ដោយឡែករថយន្តបង្កហេតុ ម៉ាកកូរ៉ូណាពណ៌ ស ពាក់ស្លាកលេខភ្នំពេញ 2P- ៣៦២៨ បើកបរដោយឈ្មោះ ម៉ៅ វឿន ភេទប្រុស អាយុ៦៥ ឆ្នាំរស់នៅភូមិរការ ឃុំសំបួរមាស ក្រុងកំពង់ចាម ខេត្តកំពង់ចាមមុខរបរលក់ដូរឃាត់ខ្លួននៅអធិការដ្ឋាននគរបាលស្រុកតាំងគោក។

ជាមួយនោះរថយន្ត០១ គ្រឿងយកមករក្សាទុកនៅអធិការដ្ឋាននគរបាលស្រុកតាំងគោក ៕