រាជធានីភ្នំពេញ ៖ បុរសម្នាក់បើករថយន្ត Ford Ranger បានរេចង្កូតទៅបុកបង្គោលស្លាកប៉ាន់ណូ បណ្តាលឲ្យរងការខូចខាតយ៉ាងដំណំ កាលពីវេលាម៉ោង៩ យប់ ថ្ងៃទី២២ ខែកក្កដា ឆ្នាំ២០២១ នៅតាមបណ្ដោយផ្លូវជាតិលេខ ១ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។

តាមប្រភពព័ត៌មានពីបងប្អូនប្រជាពលរដ្ឋនៅកន្លែងកើតហេតុបានឲ្យដឹងថា គេបានឃើញរថយន្តស៊េរីទំនើបម៉ាក Ford Ranger មួយគ្រឿង ដែលពាក់ស្លាក លេខ ភ្នំពេញ 2BN-8386 បើកដោយបុរសម្នាក់ ក្នុងទិសដៅពីលិចទៅកើត លុះមកដល់ចំណុចកើតហេតុ ក៏រេចង្កូតឡើងសួនច្បារពុះចែកទ្រូងផ្លូវ និងស្លាកប៉ាន់ណូ បណ្តាលឲ្យរថយន្តរងការខូចខាតយ៉ាងដំណំតែម្តង។

ក្រោយកើតហេតុ នគរបាលចរាចរណ៍ខណ្ឌច្បារអំពៅ បានមកដល់ និងបានទាក់ទងទៅសមត្ថកិច្ចជំនាញចរាចរណ៍នៃស្នងការនគរបាលរាជធានីភ្នំពេញ ដើម្បីធ្វើការវាស់វែង និងស្ទូចរថយន្តយកទៅរក្សាទុកនៅស្នងការនគរបាលរាជធានីភ្នំពេញ រង់ចាំម្ចាស់ចូលមកដោះស្រាយទៅតាមផ្លូវច្បាប់ ៕