ខេត្តព្រះសីហនុ ៖ បុរសម្នាក់ជិះម៉ូតូលឿនដូចហោះ ចាប់ហ្វ្រាំងមិនទាន់ ជ្រុលជិះធ្លាក់លូ បណ្ដាលឲ្យរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ បង្កការភ្ញាក់ផ្អើល កាលពីល្ងាចថ្ងៃទី២៣ ខែកក្កដា ឆ្នាំ២០២១ នៅចំណុចផ្លូវបេតុង ស្ថិតក្នុងភូមិ៣ សង្កាត់៤ ក្រុងព្រះសីហនុ ខេត្តព្រះសីហនុ ។

ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ មានប្រជាពលរដ្ឋ បានឃើញបុរសម្នាក់ ជិះម៉ូតូម៉ាក Suzuki viva ពណ៌ខ្មៅ ពាក់ស្លាកលេខ កំពង់ស្ពឺ 1B-6402 ធ្វើដំណើរតាមបណ្ដោយផ្លូវលេខ២០១ ក្នុងល្បឿនលឿន ជិះពីជើងទៅត្បូង លុះដល់ចំណុចកើតហេតុ ចាប់ហ្វ្រាំងមិនទាន់ ក៏រេចង្កូត ជិះចូលប្រឡោះលូតែម្ដង បះជើងឡើងលើ។ ចំណែកមនុស្សវិញផ្លោងចេញពីម៉ូតូ បណ្ដាលអោយរងរបួសធ្ងន់។

ក្រោយពេលកើតហេតុជនរងគ្រោះខាងលើ ត្រូវបានបញ្ជូន យកទៅព្យាបាលនៅមន្ទីរពេទ្យ មិត្តភាពឃ្លាំងលើ។ ចំណែកម៉ូតូសមត្ថកិច្ចជំនាញចរាចរណ៍យកទៅរក្សាទុកទៅការិយាល័យចរាចរណ៍ រង់ចាំជនរងគ្រោះត្រឡប់មកយកវិញ៕