រាជធានីភ្នំពេញ៖ បុរសម្នាក់ ផ្ទុះអាវុធ២គ្រាប់ រំសាយកំហឹងឈ្លោះគ្នាជាមួយនឹងនារីជាសង្សារ បង្កការភ្ញាក់ផ្អើលដល់សមត្ថកិច្ច ចុះមកឃាត់ខ្លួនភ្លាមៗ កាលពីវេលាម៉ោង ១០យប់ ថ្ងៃទី២៥ ខែកក្កដា ឆ្នាំ២០២១ នៅចំណុចសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីមេប៉ុស្តិ៍រដ្ឋបាលសង្កាត់ត្រពាំងក្រសាំង បានឲ្យដឹងថា លោកបានសាកសួរទៅបុរសម្នាក់ ដែលជាអ្នកប្រើប្រាស់អាវុធមួយដើមដែលបានផ្ទុះ ២គ្រាប់ នៅនឹងកន្លែងកើតហេតុ ដោយសារតែខឹងស្រីស្នេហ៍របស់ខ្លួនឈប់ស្រលាញ់ និងសុំចែកផ្លូវគ្នា ហើយខាងស្រីមានសង្សារថ្មី ទើបខឹងដកកាំភ្លើងពីចង្កេះអាមេបាញ់ ២គ្រាប់ បង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ចចុះមកធ្វើការចាប់ឃាត់ខ្លួនតែម្តងបញ្ជូនមកប៉ុស្តិ៍នគរបាលរដ្ឋបាលត្រពាំងក្រសាំង ដើម្បីធ្វើឯកសារបញ្ជូនទៅអធិការដ្ឋាននគរបាលខណ្ឌពោធិ៍សែនជ័យ។

លោកមេប៉ុស្តិ៍ បានបន្តទៀតថា លោកបានឲ្យកម្លាំងសមត្ថកិច្ចរបស់លោក ចុះស្រាវជ្រាវទៅដល់ទីតាំងចំណុចកើតភ្លាមៗ ដោយបានរកឃើញនូវសំបក កន្ទុះគ្រាប់កាំភ្លើងចំនួន ២គ្រាប់ដែលនៅកន្លែងកើតហេតុ ។

លោកមេប៉ុស្តិ៍ បានបន្ថែមឲ្យដឹងទៀតថា សមត្ថកិច្ចលោកបាននិងកំពុងធ្វើឯកសារបញ្ជូនបុរសម្នាក់ ដែលជាខ្មាន់កាំភ្លើងបាញ់ចំនួន ២គ្រាប់ ធ្វើការឃាត់ខ្លួនបញ្ជូនទៅអធិការដ្ឋាននគរបាលខណ្ឌពោធិ៍សែនជ័យ ដើម្បីចាត់ចែងតាមនីតិវិធីច្បាប់។ ចំណែកឯនារីរងគ្រោះបានដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលត្រពាំងក្រសាំងផងដែរ ៕