ខេត្តក្រចេះ ៖ សមត្ថកិច្ចជំនាញព្រហ្មទណ្ឌ នៃអធិការដ្ឋាននគរបាលស្រុកស្នួល ធ្វើការចាប់ឃាត់ខ្លួនបានជនសង្ស័យម្នាក់ ដែលជាអ៊ុសាច់ថ្លៃ ក្រោយបានធ្វើសកម្មភាពចាប់រំលោភទៅលើក្មួយស្រី អាយុ១២ឆ្នាំ បានសម្រេចជាច្រើនលើក ពេលនាងទៅឃ្វាលគោ នៅព្រៃឆ្ងាយពីផ្ទះ។
អ៊ុសាច់ថ្លៃ រូបនេះ ត្រូវបានសមត្ថកិច្ចចាប់ខ្លួននៅវេលាម៉ោង៨និង២០នាទី ថ្ងៃទី២៦ ខែកក្កដា ឆ្នាំ២០២១ នៅភូមិមានជ័យ ឃុំស្រែចារ ស្រុក ស្នួល ខេត្តក្រចេះ ។
សមត្ថកិច្ចបានឲ្យដឹងថា ការចាប់ខ្លួននេះ គឺធ្វើឡើងក្រោយទទួលបានពាក្យបណ្តឹងពីម្តាយរបស់ក្មេងស្រីរងគ្រោះ ថាត្រូវបានឈ្មោះ ផេង ថន ភេទប្រុស អាយុ៣៨ឆ្នាំ ត្រូវជាអ៊ុសាច់ថ្លៃ បានធ្វើសកម្មភាពចាប់រំលោភកូនស្រីកូន បានសម្រេចជាច្រើនលើកពេលកូនស្រីរបស់ខ្លួន បានទៅឃ្វាលគោជាមួយតែ០២នាក់ នៅក្នុងព្រៃស្ងាត់ឆ្ងាយពីផ្ទះ ។
តាមការបំភ្លឺរបស់ក្មេងស្រីរងគ្រោះ បានឲ្យសមត្ថកិច្ចដឹងថា ក្នុងឆ្នាំ២០១៨ ពេលទៅឃ្វាលគោ អ៊ុសាច់ថ្លៃ បានឲ្យទូរស័ព្ទខ្លួនមើលរឿងថៃ បន្ទាប់ពីមើលរួច បានធ្វើសកម្មភាពបៀតបៀននិងរំលោភខ្លួនរហូតបានសម្រេច និងហាមខ្លួនមិនឲ្យយករឿងនេះទៅប្រាប់ឪពុកម្តាយនាងនោះទេ ។ លុះក្រោយមកទៀត ឲ្យតែទៅឃ្វាលគោ គឺអ៊ុសាច់ថ្លៃរូបនេះ តែងតែធ្វើរភងបែបនេះដដែលៗរហូតមក ជាច្រើនលើកច្រើនសារ។ រហូតដល់ថ្ងៃទី១៨ ខែកក្កដា ឆ្នាំ២០២១ វេលាម៉ោង២រសៀល ក៏ធ្វើសកម្មភាពម្តងទៀត។
ក្រោយការចាប់ឃាត់ខ្លួន ជនសង្ស័យរូបនេះ បានសារភាពថា ពិតជាបានធ្វើសកម្មភាពរំលោភទៅលើ ក្មួយស្រីពិតមែន
បច្ចុប្បន្នជនសង្ស័យខាងលើ ត្រូវបានសមត្ថកិច្ចឃាត់ខ្លួនបណ្តោះអាសន្ន នៅអធិការដ្ឋាននគរបាលស្រុកស្នួល ដើម្បីកសាងសំណុំរឿង បញ្ជូនទៅការិយាល័យជំនាញខេត្ត ចាត់ការបន្តតាមនីតិវិធីច្បាប់បន្តទៀត ៕
