រាជធានីភ្នំពេញ ៖ ជនសង្ស័យម្នាក់ ក្នុងចំណោមបក្ខពួក០២នាក់ បានធ្វើសកម្មភាពឆក់កាបូប ពីស្រ្តីនាក់មិនបានសម្រេចព្យាយាមជិះរត់គេចតែរត់មិនត្រូវបានបងប្អូនប្រជាពលរដ្ឋ ចាប់ប្រគល់មកឲ្យសមត្ថកិច្ច។

ហេតុការណ៍នេះបានកើតឡើង កាលពីវេលាម៉ោង១២និង២០នាទីរសៀល ថ្ងៃទី២៧ ខែកក្កដា ឆ្នាំ២០២១ នៅតាមផ្លូវបេតុង កែងនិងមហាវិថីឈ្នះឈ្នះ ក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យមានឈ្មោះចាន់ វាសនា ភេទប្រុសអាយុ១៨ឆ្នាំ មុខរបរមិនពិតប្រកដ ស្នាក់នៅសង្កាត់គោករកា ខណ្ឌព្រែកព្នៅ រាជធានីភ្នំពេញ ។ ចំណែកជនរងគ្រោះឈ្មោះម៉ាន រុង ភេទស្រី អាយុ៦០ឆ្នាំ មុនរបរលក់ដូរនៅផ្ទះកន្លែងកើតហេតុខាងលើ ។

ប្រភពព័ត៌មានពីជនរងគ្រោះបានបញ្ជាក់ប្រាប់ក្រុមការងារ TVFB ឲ្យដឹងថាមុនពេលកើតហេតុ រូបគាត់បានយកកាបូបក្រវ៉ាត់ជាប់និងចង្កេះ ក្នុងនោះមានលុយសរុបជាង១០លានរៀល និងទូរស័ព្ទ០២គ្រឿង តែដោយសារតែគាត់អោនលាងធុងមិនកើតគាត់ក៏បានដោះចេញយកមកដាក់លើធុងទឹកកក និងយកមួកដាក់ពីលល ខណៈពេលកំពុងអោនលាងស្រាប់តែលេចមុខជនសង្ស័យម្នាក់ ក្នុងចំណោមបក្ខពួក០២នាក់ បានជិះម៉ូតូហុងដាឌ្រីមសង់ស៊េរីឆ្នាំ២០២១ ពណ៌ខ្មៅ ពាក់ស្លាកលេខភ្នំពេញ1IQ 0671 មកធ្វើសកម្មភាពឆក់យកកាបូបរបស់គាត់បានសម្រេច ភ្លាមនោះរូបគាត់ក៏បានស្រែកថាចោរៗទើបបង្កការភ្ញាក់ផ្អើលដល់បងប្អូនប្រជាពលរដ្ឋស្ទាក់ចាប់បាន ០១នាក់ និងម្នាក់ទៀត បានរត់គេខ្លួនបាត់ រួចចាប់ប្រគល់មកឲ្យសមត្ថកិច្ចតែម្តង ។

ក្រោយកើតហេតុ សមត្ថកិច្ចមូលដ្ឋានបានចុះទៅដល់ចំណុចកើតហេតុ និងនាំជនសង្ស័យទៅសាកសួរបន្តនៅប៉ុស្តិ៍រដ្ឋបាលនគរបាលសំរោងក្រោមដើម្បីកសាងសំណុំរឿងបញ្ជូនទៅផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យចាត់ការតាមច្បាប់៕ មេសា