ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងនៅរសៀលថ្ងៃទី២៧ ខែកក្កដា ឆ្នាំ២០២១នេះថា នគរបាល បានឃាត់ខ្លួនជនសង្ស័យជាជនជាតិចិនម្នាក់ ដកហូតកាំភ្លើងខ្លីមួយដើម និងសម្ភារៈពាក់ពន្ធ័មួយចំនួនទៀត ។

សូមបញ្ជាក់ថា កាលពីយប់រំលងអាធ្រាត្រឆ្លងចូលថ្ងៃទី ២៥ ខែកក្កដា ឆ្នាំ២០២១ មានករណីផ្ទុះអាវុធ ចំនួន ០៣គ្រាប់ នៅក្នុងបន្ទប់ជួលមួយកន្លែងដែលជនជាតិចិនបានជួល ស្ថិតនៅចំណុចក្រុមទី១០ ភូមិ២ សង្កាត់លេខ១ ក្រុង-ខេត្តព្រះសីហនុ ។

បន្ទាប់ពីទទួលបានព័ត៌មានពីការផ្ទុះអាវុធនេះភ្លាម កម្លាំងជំនាញផែនការងារនគរបាលព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុងព្រះសីហនុ ចុះទៅដល់កន្លែងកើតហេតុ និងបានធ្វើការហ៊ុមព័ទ្ធបន្ទប់ដែលកើតហេតុ រហូតដល់វេលលាម៉ោង ០៦ និង ៣០នាទី ព្រឹក ទើបធ្វើការឃាត់ខ្លួនបានជនប្រដាប់អាវុធ ដែលជាជនជាតិចិននោះ ។

ជុំវិញរង្វង់ប្រតិបត្តិការនេះ សមត្ថកិច្ចបានឃាត់ខ្លួន ជនសង្ស័យឈ្មោះ WANG XUDONG ភេទប្រុស អាយុ ៣៨ឆ្នាំ ជនជាតិចិន មុខរបរ មិនពិតប្រាកដ ស្នាក់នៅផ្ទះជួល ក្រុមទី១០ ភូមិ២ សង្កាត់១ ក្រុង-ខេត្តព្រះសីហនុ និងធ្វើការដកហូតបាន ៖

-កាំភ្លើងខ្លី ០១ដើម ម៉ាក ZORAKI ពណ៌ទឹកប្រាក់ មានលេ​ខសម្គាល់ៈ 000326

-បង់កាំភ្លើង ០១

-គ្រាប់កាំភ្លើង ៤៤គ្រាប់

-សំបកកាទុស ០៣គ្រាប់

-ស្រោមកាំភ្លើង ០១

-កាំភ្លើងបាញ់ឆក់ ០១

-ខ្នោះដៃ ០១គូរ

-កូនកាំប៉ិតស្នៀត ០២

-ស្បែកជើងកវែង ០២គូរ

-ទូរស័ព្ទដៃ ០២គ្រឿង

-លិខិតឆ្លងដែន ០២ក្បាល ។

បច្ចុប្បន្នជនសង្ស័យខាងលើ ត្រូវបាននគរបាលបញ្ជូនទៅសាលាដំបូងខេត្ត ហើយត្រូវបានចៅក្រមចេញដីការឃុំខ្លួនហើយ៕