រាជធានីភ្នំពេញ ៖ សមត្ថកិច្ចប្រដេញចាប់បានជនសង្ស័យម្នាក់ ដែលធ្វើសកម្មភាពឆក់កាបូបពីប្រជាពលរដ្ឋ នៅម្ដុំផ្លូវសាលាដែក ។ ហេតុការណ៍នេះកើតឡើងនៅម៉ោង១១យប់ ថ្ងៃទី២៧ ខែកក្កដា ឆ្នាំ២០២១ ក្នុងសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។
តាមប្រភពព័ត៌មានពីសមត្ថកិច្ច បានឲ្យដឹងថា បើតាមចម្លើយសារភាពរបស់ជនសង្ស័យ គឺពួកគេមានបក្ខពួកចំនួន ៤ នាក់ជិះម៉ូតូ ២ គ្រឿង បានធ្វើសកម្មភាពឆក់កាបូបនារីម្នាក់ នៅម្ដុំវត្តទួល លុះពេលឆក់បានសម្រេច ជនរងគ្រោះក៏ជិះតាមស្រែកឆោឡោឲ្យគេជួយ ភ្លាមនោះកងកម្លាំងរបស់សមត្ថកិច្ចអធិការដ្ឋាននគរបាលខណ្ឌឫស្សីកែវ បានធ្វើការល្បាតឃើញក៏ប្រដេញចាប់បានជនសង្ស័យម្នាក់នៅម្ដុំផ្លូវរទេះភ្លើង។ ចំណែកឯបក្ខពួក ៣នាក់ទៀតបានជិះរត់គេចខ្លួន។
ក្រោយពេលកើតហេតុ សមត្ថកិច្ចបាននាំខ្លួនជនសង្ស័យខាងលើ ទៅប៉ុស្តិ៍នគរបាលទួលសង្កែទី១ ដើម្បីធ្វើការសាកសួរ និងបញ្ជូនខ្លួនទៅកាន់អធិការដ្ឋាននគរបាលខណ្ឌឬស្សីកែវ ដើម្បីចាត់ការតាមនិតិវិធីច្បាប់៕
